Necə edək doğuş zamanı ölüm olmasın? - Ginekoloqdan ətraflı izah

Mayın 3-də 39 həftəlik hamiləlik, dölün köndələn gəlişi, I cərrahi doğuş” diaqnozu ilə daxil olduğu Lənkəran rayon Mərkəzi Xəstəxananın Perinatal mərkəzində qeysəriyyə əməliyyatı nəticəsində uşağın doğulması, ertəsi gün ananın vəziyyətinin pisləşməsi və saat 21 radələrində ölməsi hadisəsi bu kimi faciəvi halların ölkə ərazisində tez-tez baş verdiyini yenidən mətbuatın gündəminə çevirdi.

Teleqraf.com xəbər verir ki, mövzu ilə bağlı Almaniyada ixtsaslaşmış cərrah mama-ginekoloq, sonsuzluq və riskli hamiləlik üzrə mütəxəssis, ekspert Pərvin Mikayılzadə açıqlama verib.

Tanınmış həkim ekspert Ümümdünya Səhiyyə Təşkilatının göstəricilərinə görə dünya statistikası üzrə ana ölümünün əsas səbəblərini sadalayaraq bildirib ki, doğuşdan sonrakı qanaxma, hamilənin arterial təzyiqinin kəskin artması və onun fəsadı – preeklampsiya – eklampsiya, qanın patoloji laxtalanması və trombun ana damarlarına tıxanması – tromboemboliya, doğuşdan sonrakı infeksiya – uşaqlığın ifeksiyalaşması və infeksiyanın qana keçməsi – sepsis və bir neçə nadir rast gələn əlavə səbəblərin belə faciəvi halların yaşanmasına yol açır.

Cərrah mama-ginekoloqun sözlərinə görə, həmin xəstəliklərin yaranmasının qarşısını almaq, müalicə etmək təbii ki, mümkündür: “Hamilələrin belə durumla üzləşməməsi üçün qadın vaxtı-vaxtında müayinələrdən keçməli, düzgün həkim müşahidəsi altında saxlanılmalıdır. Hamiləlik dövründən qabaq müayinə olunub, fəsad törədə biləcək gizli xəstəliklərin əvvəlcədən aşkara çıxarılıb müalicə olunması hamiləliyin uğurla başa çatmasına zamin olur. Qadınlarımıza əsas məsləhətimiz ondan ibarətdir ki, hamiləlik dövründə mütəmadi həkimə müraciət etsinlər, belədə yaranan fəsadları vaxtında aradan götürmək daha asan olur və onlar da xoşbəxt, sağlam analıq hissini yaşayır, düyaya sağlam körpə gətirirlər”.

Pərvin Mikayılzadə onu da təəssüflə vurğulayıb ki, qadınlarımız, xüsusən də bölgələrdə yaşayan hamilələr, bununla yanaşı, ümumiyyətlə xanımlar xüsusən ginekoloqa getməyə həvəs göstərmirlər: “Bilirsiniz, bizdə bəzən ziyanlı ənənə də təbliğ olunur. Nə qədər gülməli görünsə də, deməmək olmur. Şahidi olduqlarımı deyirəm: həkimə getmək məsələsi gələndə bəzən qaynanalar gəlinlərinə, analar qızlarına belə deyirlər: “Biz bu uşaqlara hamilə olanda heç həkimə getməzdik. Onlara izah edirəm ki, dövrlər arasında böyük fərq var. Sizin dövrünüzdə ekologiya, sosial mühit, informasiya məkanı, qlobal təsirlər, qida tərkibləri bu dərəcədə dəyişməmişdi. İndiki hamilələrdə elə fəsadlar meydana gəlir ki, tarixən belə xəstəliklər olmayıb. Bir sözlə, dünyaya sağlam uşaq gətirmək həm də ona görə vacibdir ki, o körpə təkcə valideynin deyil, cəmiyyətindir, dövlətindir. Uşaqları sağlam doğmaq, sağlam böyütmək, sağlam yaşatmaq hər birimizin ümdə vəzifəmiz, əsas borcumuzdur”.