FHN-də “Heydər Əliyev İli”nə həsr olunmuş tədbir keçirildi - Foto

Fövqəladə Hallar Nazirliyinin Sumqayıt Regional Mərkəzində “Heydər Əliyev İli”nə həsr olunmuş “Heydər Əliyev və milli dövlətçilik təfəkkürü” mövzusunda tədbir keçirilib.

Teleqraf.com xəbər verir ki, tədbirdə FHN-in Sumqayıt Regional Mərkəzinin rəisi polkovnik Vaqif Fətullayev, Nazirliyin Regional mərkəzlərlə işin təşkili, layihələrin idarə edilməsi və təhsil məsələləri üzrə Baş idarəsinin şöbə müdiri Fərid Gülməmmədov, Yeni Azərbaycan Partiyası Sumqayıt şəhər təşkilatının sədri Ramiz Hüseynov, Sumqayıt Dövlət Universitetinin dosenti, tarix üzrə fəlsəfə doktoru Əmirxan İsayev və FHN-in yerli qurumlarının rəhbərləri iştirak ediblər.

Əvvəlcə, tədbir iştirakçıları xalqımızın ümummilli lideri Heydər Əliyevin büstünü ziyarət edərək önünə gül dəstələri qoyub, Ulu Öndərin əziz xatirəsini dərin ehtiramla yad ediblər.

Mərkəzin akt zalında davam edən toplantıda, əvvəlcə Azərbaycan Respublikasının Dövlət Himni səsləndirilib, ulu öndər Heydər Əliyevin və ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Ümummilli lider Heydər Əliyevin Azərbaycan xalqı qarşısında misilsiz xidmətlərindən danışan Sumqayıt Regional Mərkəzinin rəisi polkovnik Vaqif Fətullayev çıxışında qeyd edib ki, ömrünün hər gününün, hər anının mənasını xalqa, millətə, dövlətə xidmət etməkdə görən Dahi Rəhbər öz xalqını zamanın mürəkkəb tarixi-siyasi sınaqlarından uğurla çıxarıb və ardıcıl mübarizə apararaq onu müstəqilliyə qovuşdurmuş qüdrətli şəxsiyyətdir. Davamlı yüksəliş yolunda inamla irəliləyən müasir Azərbaycan Heydər Əliyevin ideyalarının təntənəsidir. Ulu Öndərin qurub-yaratdığı, müstəqilliyə qovuşdurduğu müasir Azərbaycanın hazırda Prezident, Müzəffər Ali Baş Komandan cənab İlham Əliyevin rəhbərliyi altında sürətlə inkişaf etdiyini, qarşıya qoyduğu hədəflərə çatdığını bildirən V.Abdullayev, ərazi bütövlüyümüzün və suverenliyimizin bərpa olunduğunu, ölkəmizin dünyanın lider dövlətlərindən birinə çevrildiyini qürur hissilə dilə gətirib.

Sonra FHN-in Regional mərkəzlərlə işin təşkili, layihələrin idarə edilməsi və təhsil məsələləri üzrə Baş idarəsinin şöbə müdiri Fərid Gülməmmədov, Yeni Azərbaycan Partiyası Sumqayıt şəhər təşkilatının sədri Ramiz Hüseynov, Sumqayıt Dövlət Universitetinin dosenti, tarix üzrə fəlsəfə doktoru Əmirxan İsayev və digər çıxış edənlər ümummilli lider Heydər Əliyevin Azərbaycan xalqı qarşısındakı tarixi xidmətlərindən danışıb və Ulu Öndərin adının dünyanın hər yerində uca tutulduğunu, xatirəsinin ehtiramla anıldığını qeyd ediblər.

Sonda ulu öndər Heydər Əliyevin həyat və fəaliyyətindən bəhs edən sənədli film nümayiş olunub.