FHN silsilə maarifləndirmə tədbirləri keçirdi - Foto

Fövqəladə Hallar Nazirliyinin aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə silsilə tədbirlər keçirilib.

Nazirlikdən Teleqraf.com-a verilən məlumata görə, FHN-in Dövlət Yanğın Nəzarəti Xidmətinin mütəxəssislərinin də iştirakı ilə Bakı Regional Mərkəzi tərəfindən Bakı şəhəri, Pirallahı rayonu 184 nömrəli tam orta məktəbində, Binəqədi rayonu 246 nömrəli məktəb-liseydə, Nəsimi rayonu 159 nömrəli orta məktəbində, Xətai rayonu Humanitar fənlər təmayüllü məktəb-liseydə və 86 nömrəli tam orta məktəbdə, Sumqayıt Regional Mərkəzi tərəfindən Sumqayıt şəhər 10 nömrəli tam orta məktəbdə, Cənub Regional Mərkəzi tərəfindən Masallı rayon A.Qurbanov adına Rüdəkənar kənd tam orta məktəbində və Astara Dövlət Aqrar İnkişaf Mərkəzində, Şimal Regional Mərkəzi tərəfindən Quba rayonu İqriq kənd tam orta məktəbində, Aran Regional Mərkəzi tərəfindən Mingəçevir şəhəri Texniki Humanitar Liseyində və Zərdab rayonu Bəyimli kənd tam orta məktəbində maarifləndirmə tədbirləri keçirilib.

Tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.

Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğınların baş vermə səbəbləri və bu zaman zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub, ilkin yanğınsöndürmə vasitələrindən istifadə qaydaları əyani şəkildə nümayiş etdirilib.

İnteraktiv formada keçirilən tədbirlər zamanı suallar ətraflı cavablandırılıb.