Qumbara gəzdirən gəncəli saxlanıldı: 'Məhlədən tapmışam' - FOTO

“Tapançanı Rusiyadan gətirmişəm"

Kəpəz TV (Region TV) xəbər verir ki, Gəncə şəhəri Yeni Gəncə qəsəbəsində yaşayan Sənan İbrahimov qanunsuz silah-sursat saxlaması barədə Nizami Rayon Polis İdarəsinə əməliyyat məlumatı daxil olub. Məlumat əsasında əməliyyat tədbirlərinə başlayan polis əməkdaşları İbrahimovu yaşadığı binanın qabağında saxlamağa müvəffəq olub.

Nizami Aslanov - müstəntiq: “İbrahimov Sənan Əjdər oğlunun idarədə üzərinə baxış keçirilib. Baxış zamanı müəyyən edilib ki, onun üzərində qanunsuz istintaqa məlum olmayan mənbədən 1 tapança və 8 patronu var”.

Sonradan İbrahimovun yaşadığı mənzilə baxış keçirilən zaman oradan da döyüş üçün yararlı olan əl qumbarası aşkarlanaraq götürülüb.

Hələlik silahların hansısa cinayət əməlində istifadə olunub-olunmaması məlum deyil. Saxlanılan Sənan İbrahimov silahları saxlamaqda hansısa məqsədinin olmadığını bildirib.

Sənan İbrahimov- saxlanılan şəxs: “Tapançanı Rusiyadan gətirmişəm. Qumbaranı isə məhlədən tapmışam. Mənim heç kimlə şəxsi qərəzliyim olmayıb”.

Sənan İbrahimov bundan əvvəl də məhkumluq həyatı yaşayıb.