Bağban məhkəmə zalında həbs edildi

Bu gün Bakı Ağır Cinayətlər Məhkəməsində tərkibində narkotik maddə olan bitki əkməkdə təqsirləndirilən Heydər Piriyevin cinayət işi üzrə məhkəmə prosesi başa çatıb.

Teleqraf.com xəbər verir ki, hakim Samir Əliyevin sədrliyi ilə keçirilən prosesdə təqsirləndirilən şəxsə hökm oxunub.

Heydər Piriyev 3 il azadlıqdan məhrum edilib. Seçilmiş ev dustaqlığı qətimkan tədbiri ləğv edilib və o, məhkəmə zalında həbs olunub.

İttihama görə, Heydər Piriyev ötən ilin sentyabrın 9-da Xəzər rayonu, Qala qəsəbəsində hüquq-mühafizə orqanları əməkdaşları tərəfindən saxlanılıb. O, evinin həyatyanı sahəsində qanunsuz olaraq tərkibində narkotik maddələr olan bitkiləri əkib. Əməliyyat zamanı 25 ədəd cətənə kolu aşkar edilib.

Hacı Zeynalov