Minsk qrupu bəyanat yaydı: "Gərginliyə yol vermək olmaz"

ATƏT-in Minsk qrupunun həmsədrləri İqor Popov (Rusiya), Endryu Şofer (ABŞ), Stefan Viskonti (Fransa) və ATƏT-in fəaliyyətdə olan sədrinin şəxsi nümayəndəsi Anji Kaspşik Azərbaycanla Ermənistan arasındakı sərhəddə vəziyyətlə bağlı bəyanat veriblər.

Teleqraf.com xəbər verir ki, bəyanatda insanların həlak olmasından təəssüfləndikləri bildirilir və ölənlərin ailələrinə başsağlığı verilir.

Həmçinin bu hadisənin əvvəlindən Ermənistan və Azərbaycanın rəsmi şəxslərilə birbaşa təmas qurulduğu göstərilir: “Minsk qrupu həmsədrləri atəşkəs rejiminin son pozulmalarını pisləyərək tərəfləri aralarındakı birbaşa rabitə kanallarından da istifadə etməklə vəziyyətin daha da gərginləşməsinin qarşısını almaq üçün hər cür zəruri tədbirlər görməyə çağırır".

Həmsədrlər həmçinin tərəfləri ən qısa zamanda danışıqları bərpa etməyə çağıraraq ATƏT-in müşahidəçilərini regiona qaytarmağın zəruriliyini vurğulayıblar.