“İstefa verməmişəm, işdən çıxarılmışam” – İmperator

Türkiyə millisinin baş məşqçisi vəzifəsindən ayrılan Fatih Terim bu gün Tvitter hesabından açıqlama yayıb.

Teleqraf.com xəbər verir ki, Fatih Terim qeyd edib ki, o üç il yarımdır çalışdığı Türkiyə Futbol Federasiyasındakı (TFF) vəzifəsindən istefa verməyib, çıxarılıb.

“Bir müddət əvvəl yaşanan olaydan (restorandakı məlum dava nəzərdə tutulur – red.) sonra Yıldırım Demirörənə (TFF prezidenti – red.) dedim ki, əgər bu hadisə quruma və şəxslərə zərər verirsə, vəzifəmdən gedə bilərəm. Bundan sonra Yıldırım Dəmirörən məni qucaqlayaraq “Hocam, hələ görüləsi çox işimiz var”, - dedi”, – F.Terim yazıb.

O, daha sonra qeyd edib ki, bu görüşdən bir neçə gün sonra Əli Dürüst (TFF-nin birinci vitse-prezidenti – red.) rəhbərliyinin onun işinə son verdiyi barədə qərarı açıqlayıb.

F.Terim qeyd edib ki, bundan sonra Yıldırım Dəmirörənlə yenidən görüşüb: “Ondan həqiqəti söyləməsini istədim. Dedi ki, sənə çox təzyiq ediblər. Sənə görə də bizə təzyiq edirlər”.