İş adamları Braziliyaya gedəcək

Azərbaycan və Braziliya arasında iqtisadi-ticarət əlaqələrinin genişləndirilməsinə dair müzakirələr aparılıb.

İqtisadiyyat Nazirliyindən Teleqraf.com-a verilən məlumata görə, bu məqsədlə noyabrın 15-də İqtisadiyyat naziri Şahin Mustafayev Braziliyanın ölkəmizdə səfərdə olan Xarici Əlaqələr naziri Aloyzio Nunesin rəhbərlik etdiyi nümayəndə heyəti ilə görüşüb. Görüşdə Azərbaycan iqtisadiyyatının müxtəlif sahələrində fəaliyyət göstərən iş adamları da iştirak edib.

Ş.Mustafayev Azərbaycan və Braziliya arasında siyasi əlaqələrin yüksək səviyyədə olduğunu, iqtisadi-ticarət əlaqələrinin də bu səviyyəyə qaldırılmasının vacibliyini vurğulayıb. Qeyd edilib ki, ölkələrimiz arasında ticarət və investisiya əməkdaşlığı sahəsində imzalanmış anlaşma memorandumları, 2017-ci ildə yaradılmış Azərbaycan və Braziliya hökumətləri arasında Ticarət və İnvestisiyalar üzrə Birgə İşçi Qrupu iqtisadi-ticarət əlaqələrinin genişləndirilməsi baxımından əhəmiyyətlidir.

Nazir kənd təsərrüfatı, ticarət, investisiya qoyuluşu, turizm, İKT, enerji və s. sahələrdə əməkdaşlıq imkanlarını, sahibkarlar arasında əlaqələrin qurulmasının əhəmiyyətini diqqətə çatdırıb. Bildirilib ki, 2017-ci il yanvar-sentyabr aylarında ölkələrimiz arasında ticarət dövriyyəsi 5% artıb və ticarət əlaqələrinin genişləndirilməsi üçün ixrac potensialı olan məhsullar müəyyən edilməlidir. Braziliya şirkətləri Azərbaycanda yaradılmış sənaye parklarında və aqroparklarda investor qismində iştirak edə, kənd təsərrüfatı məhsullarının birgə istehsalı sahəsində əməkdaşlıq həyata keçirilə bilər. İqtisadiyyat naziri 2018-ci ilin mart ayında iş adamlarının da təmsil olunacağı Azərbaycan nümayəndə heyətinin Braziliyaya səfər edəcəyini diqqətə çatdırıb.

A.Nunes ilk dəfə olaraq ölkəmizə səfər etdiyini və Azərbaycana səfərindən məmnunluğunu ifadə edib. Qeyd olunub ki, beynəlxalq arenada ölkələrimiz bir-birini dəstəkləyir, hər iki ölkədə səfirliklərimiz fəaliyyət göstərir. Azərbaycanın planlı iqtisadiyyatdan bazar iqtisadiyyatına uğurla keçdiyini, ölkəmizin regionun aparıcı dövlətlərindən olduğunu qeyd edən A.Nunes Azərbaycanın xarici iqtisadi əlaqələrinin yüksək səviyyədə olduğunu bildirib. Braziliya-Azərbaycan iqtisadi əlaqələrinin genişləndirilməsi üçün lazımi şəraitin yarandığını bildirən nazir hüquqi çərçivənin genişləndirilməsinin və sadələşdirilməsinin əhəmiyyətini diqqətə çatdırıb. Braziliya iqtisadiyyatı, aparılan iqtisadi islahatlar barədə məlumat verən braziliyalı nazir ölkələrimiz arasında iqtisadi-ticarət əlaqələrinin genişləndirilməsi imkanlarına dair fikirlərini bölüşüb, ölkəsinə investisiya qoyuluşunda maraqlı olduqlarını qeyd edib, Azərbaycanlı iş adamlarını Braziliyaya dəvət edib.

Sonra görüşdə iştirak edən Azərbaycan iş adamları təmsil etdikləri şirkətlərin fəaliyyəti və Braziliya ilə əməkdaşlıq imkanları barədə məlumat veriblər.