16 İyul 2018 23:25
742
12 Punto 14 Punto 16 Punto 18 Punto

Milli Məclis sədrinin müavini Valeh Ələsgərov Mərkəzi və Şərqi Avropa dövlətləri parlament rəhbərlərinin III zirvə toplantısında və Polşa parlamentarizminin 550 illik yubileyinə həsr edilmiş xüsusi iclasda iştirak etmək üçün Polşanın paytaxtı Varşavada səfərdə olub.

Milli Məclisin mətbuat xidmətindən Teleqraf.com-a verilən məlumata görə, V.Ələsgərovun Polşa Senatı Marşalının müavini Adam Biyelanla görüşü keçirilib. Görüşdə Milli Məclis sədrinin müavini 2018-ci ilin həm Azərbaycan, həm də Polşa üçün tarixi yubileylərin keçirilməsi ilə əlamətdar olduğunu vurğulayıb. İki ölkə arasında siyasi əməkdaşlığın uğurla davam etdirildiyi qeyd edilib. Azərbaycanla Polşa arasında ticarət dövriyyəsinin artırılması üçün geniş imkanların mövcud olduğu bildirilib. V.Ələsgərov Azərbaycanın transregional əhəmiyyəti və həyata keçirdiyi irimiqyaslı layihələr haqda ətraflı məlumat verib. Söhbət zamanı ölkə parlamentləri arasında əməkdaşlığın davam etdirilməsinin vacibliyi vurğulanıb.

Sonra Milli Məclisin sədr müavini Mərkəzi və Şərqi Avropa dövlətləri parlament rəhbərlərinin III zirvə toplantısında iştirak edib. “Parlament əməkdaşlığının gücləndirilməsi: Regionun inkişafı naminə imkan kimi” mövzusunda keçirilən paneldə çıxış edən V.Ələsgərov zirvə toplantısının regionda parlamentlərarası çoxtərəfli əməkdaşlığın inkişaf etdirilməsinə müsbət təsirini vurğulayıb. O, Azərbaycanın Avropanın enerji təhlükəsizliyinin təmin edilməsində əhəmiyyətli rolu haqda geniş məlumat verib. V.Ələsgərov Azərbaycanın Avropa və Asiya qitələrini birləşdirən əhəmiyyətli nəqliyyat layihələrinə imza atdığını və bu layihələrin əsasında etibarlı əməkdaşlığın dayandığını söyləyib. Sədr müavini Azərbaycanın toplantıya qatılan Ermənistandan başqa bütün iştirakçı ölkələrlə uğurlu əməkdaşlıq həyata keçirdiyini bildirib, işğalçı Ermənistanın isə regional əməkdaşlıqdan kənar qaldığını qeyd edib. Çıxışının sonunda V.Ələsgərov Azərbaycanın ərazi bütövlüyünün müzakirə predmeti olmadığını vurğulayıb və iclas iştirakçılarını Azərbaycanın tezliklə öz ərazi bütövlüyünü təmin edəcəyinə əmin edib.

Səfər çərçivəsində V.Ələsgərov Polşa parlamentarizminin 550 illik yubileyi və ölkənin müstəqilliyinin bərpa edilməsinin 100 illiyinə həsr olunmuş Polşa Parlamentinin xüsusi iclasına qatılıb. Xüsusi iclasda Polşa Prezidenti Andjey Duda çıxış edib.


Müəllif: Səxavət Həmid