Lavrovun İrəvan səfəri: Qarabağdan nələr danışdı?

Rusiya rəsmiləri ara-sıra Paşinyandan narazılıqlarını ifadə edə bilərlər, ancaq konseptual məsələlərdə Ermənistanın hazırki baş nazirindən narazı deyillər.

Teleqraf.com xəbər verir ki, bunu politoloq Elxan Şahinoğlu Rusiyanın Xarici İşlər naziri Sergey Lavrov Ermənistana səfəri öncəsi, noyabrın 9-da bu ölkənin “Mediamaks” agentliyinə müsahibəsində səsləndirdiyi fikirləri şərh edərkən qeyd edib.

O, Lavrovun cavablarından iki əsas fikri xüsusi vurğulayıb: “Nikol Paşinyan Rusiya ilə strateji müttəfiqliyi dərinləşdirmək siyasətinə sadiqdır”, “İrəvanın xarici siyasəti Moskvanı qane edir”.

Elxan Şahinoğlunun fikrincə, Lavrovun Dağlıq Qarabağ münaqişəsiylə bağlı bu müsahibədə söylədiyi bir başqa fikir də Ermənistanın maraqları ilə tam üst-üstə düşür:

“Lavrov bildirdi ki, Dağlıq Qarabağın statusu hüquqi nöqteyi-nəzərdən öz müqəddəratının təyini yolu ilə həll edilməlidir. Onun bu fikri o deməkdir ki, Azərbaycan bölgənin statusunu müəyyənləşdirəcək referendumun keçirilməsi ilə razılaşmalıdır. Biz həmin “refendum”un nə ilə nəticələnəcəyini yəqin bilirik. Lavrovun “məsləhəti”nin də elə həmin “nəticəyə” xidmət etdiyi bəllidir”.