Tofiq Zülfüqarovdan Qarabağ məsələsi ilə bağlı - İlginc iddia

Nəhayət ki, biz tək qaldıq – Ermənistan, Azərbaycan və koronavirus. Bir həftə əvvəl bölgədəki yeganə vasitəçilik strukturuna rəhbərlik edən ATƏT-in fəaliyyətdə olan sədrinin şəxsi nümayəndəsi Anjey Kasprşik özünü prosesdən kənarlaşdırdı. Kollektiv Təhlükəsizlik Müqaviləsi Təşkilatına üzv olan ölkələr, NATO, Avropa İttifaqı və MDB sərhədləri bağladılar və bir-biri ilə bütün əlaqələri kəsdilər.

Teleqraf.com xəbər verir ki, bunu sabiq xarici işlər naziri Tofiq Zülfüqarov bildirib.

Onun sözlərinə görə, maraqlısı budur ki, Çin, Rusiya və Kuba İtaliyaya yardım göstərdi, Avropa İttifaqının üzvü olan Çexiya isə İtaliyaya istiqamətlənmiş humanitar yardım yükünü mənimsədi:

“Amerikalı maliyyə analitikləri pandemiya səbəbindən ABŞ-ın ümumi daxili məhsulunun 30 faiz azalacağını güman edirlər. Məndən nə düşündüyümü soruşurlar. Cavab sadədir. Pandemiyadan əvvəlki – bildiyimiz beynəlxalq münasibətlər sistemi tamamilə çökdü. Böhran keçdikdən sonra hər şeyin əvvəlki qaydada bərpa olunacağına inanmaq üçün heç bir əsas yoxdur. Ona görə də bu gün reallıq bundan ibarətdir ki, Ermənistan-Azərbaycan münaqişəsində vəziyyətə təsir edən iki oyunçu var. Bunlar Ermənistan və Azərbaycandır. Düşünürəm ki, bir, yaxud iki həftə sonra Azərbaycanın Ermənistana verəcəyi sual aktual ola bilər – qoşunlarınızı işğal olunmuş Azərbaycan ərazilərindən çıxarmağa neçə gün lazımdır?”