Qaribaşvilinin Azərbaycana səfəri başladı - Yeniləndi

Gürcüstanın Baş naziri İrakli Qaribaşvili Azərbaycanda səfərə gəlib.

Bu barədə Teleqraf.com-a diplomatik mənbədən bildirilib.

Gürcüstanın Azərbaycandakı səfiri Zurab Pataradze jurnalistlərə bildirib ki, Azərbaycan Prezidenti İlham Əliyevlə görüş zamanı həm siyasi kontekstdə, həm də ticarət-iqtisadi istiqamətdə bir sıra məsələlər, mədəni-humanitar məsələlər, o cümlədən, xüsusilə diqqətəlayiq olan yaşıl enerji layihəsi, Qara dənizin dibi ilə elektrik kabelinin çəkilməsi və Avropaya enerji ixracına töhfə verəcək enerji təhlükəsizliyi məsələləri müzakirə olunacaq.

Onun sözlərinə görə, logistika məsələləri, nəqliyyat dəhlizi və bu istiqamətdə yeni layihələrin həyata keçirilməsinə də baxılacaq.

Səfir qeyd edib ki, mühüm məsələlərdən biri də Bakı-Tbilisi-Qars dəmir yolu layihəsinin genişləndirilməsi və başa çatdırılmasıdır.

***

10:39

Gürcüstanın Baş naziri İrakli Qaribaşvili Bakıya səfərə yola düşüb.

Teleqraf.com xəbər verir ki, səfər Azərbaycan Prezidenti İlham Əliyevin dəvəti ilə əsasında baş tutacaq.

Gürcüstan mətbuatının xəbərinə əsasən, Baş nazir SPECA iqtisadi forumunda iştirak edəcək, Prezident İlham Əliyevlə görüşəcək və dövlət başçılarının sammitində çıxış edəcək.