Nazirliyin vəzifəli şəxsinə pul atan bank işçisi hökmdən narazıdır - Şikayət

Bakıda dələduzluqda təqsirləndirilən Elmar Məlikov barəsində olan hökmdən apelyasya şikayəti verib.

Teleqraf.com xəbər verir ki, onun şikayəti araşdırılması üçün Bakı Apelyasiya Məhkəməsinə göndərilib.

Şikayət araşdırılması üçün hakim Rizvan Səfərovun icraatına verilib.

Məhkəmənin ilkin baxış iclası sentyabrın 6-na təyin olunub.

Qeyd edək ki, Bakı Ağır Cinayətlər Məhkəməsinin hökmü ilə Elmar Məlikov 8 il müddətinə azadlıqdan məhrum edilib.

İttihama görə, Elmar Məlikov “Bank VTB” (Azərbaycan) ASC-nin əməkdaşı vəzifəsində çalışarkən etibardan sui-istifadə və aldatma yolu ilə Tamilla Mikayılovanın əmlakını ələ keçirmək məqsədilə pul verdiyi halda “Accessbank” ASC-də debet kartla şəxsi hesabına ABŞ dolları mədaxil edərək hesabdakı pulu manata dəyişməklə məxaric edib, həmin pulu valyutadəyişmə mətəqəsində ABŞ dollarına dəyişərək yenidən şəxsi hesabına mədaxil etməklə, periodik olaraq konvertasiya əməliyyatı həyata keçirib.

Bu yolla o, zərərçəkmiş şəxsə gündəlik qazanc verəcəyini yalandan vəd edib.

Bu məqsədlə Tamilla Mikayılovadan hissə-hissə olmaqla, ümumilikdə 280 min manat, Mehman Allahverdiyevdən də eyni üsulla ümumilikdə 180 min manat alaraq, dələduzluq edib.

Mehman Allahverdiyev hazırda Əmək və Əhalinin Sosial Müdafiəsi Nazirliyində çalışır.