İmişlidə qadının qətlə yetirilməsi ilə bağlı rəsmi Açıqlama

Baş Prokurorluq İmişli rayonunda bir il əvvəl törədilən qətl hadisəsinin üstünün açılması ilə bağlı açıqlama ayıb.

Bu barədə Teleqraf.com-a Baş Pfrokurorluğun mətbuat xidmətindən məlumat verilib.

Məlumata görə, 12 yanvar 2014-cü il tarixdə İmişli rayonunun Bəhrəmtəpə qəsəbəsində məskunlaşmış Cəbrayıl rayonundan olan məcburi köçkün, 1968-ci il təvəllüdlü Səfərova Reyhan Cümşüd qızının yaşadığı evin yaxınlığında çoxsaylı bıçaq xəsarətləri ilə meyitinin aşkar edilməsi faktına görə İmişli rayon prokurorluğunda Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə cinayət işi başlanıb.

İş üzrə təxirəsalınmaz istintaq hərəkətləri aparııb, o cümlədən çoxsaylı şahidlər dindirilib, müvafiq ekspertizalar təyin edilərək rəylər alınıb və digər zəruri istintaq-əməliyyat tədbirləri yerinə yetirilib.

Rayon hüquq mühafizə orqanlarının həyata keçirdikləri istintaq-əməliyyat tədbirləri nəticəsində cinayətin 1985-ci il təvəllüdlü, İmişli rayonunun Bəhrəmtəpə qəsəbə sakini Kazımov Zülfü Vaqif oğlu tərəfindən törədilməsində əsaslı şübhələr olduğundan o, tutularaq istintaqa cəlb edilib.

İstintaq zamanı Z.Kazımov istintaqa məlum olan şəxslə qabaqcadan əlbir olub R.Səfərovanı aralarında şəxsi münasibətlər zəminində yaranmış mübahisə zamanı çoxsaylı bıçaq zərbələri ilə öldürməsini etiraf etmiş və ona Cinayət Məcəlləsinin 120.2.1 və 120.2.4-cü maddələrində nəzərdə tutulan ittiham elan edilməklə barəsində rayon məhkəməsinin qərarı ilə həbs qətimkan tədbiri seçilib.

Hazırda cinayəti törətmiş digər şəxslərin müəyyənləşdirilərək istintaqa cəlb edilməsi istiqamətində zəruri istintaq-əməliyyat tədbirləri davam etdirilir.

Hacı Zeynalov