Bob Dilandan qəti addım - Nobeli almağa getməyəcək

2016-cı il ədəbiyyat üzrə Nobel mükafatına layiq görülən amerikalı müğənni Bob Dilan mükafatın təqdimat mərasiminə qatılmayacağını açıqlayıb.

Teleqraf.com Türkiyə mətbuatına istinadən xəbər verir ki, Bob Dilan boş vaxtı olmadığı üçün dekabrın 10-da Stokholmda keçiriləcək mərasimdə iştirak edə bilməyəcəyini yazılı şəkildə bəyan edib. O, bu mükafata layiq görüldüyünə görə qürur hissi keçirdiyini bildirib.

Mükafat Dilana "Amerikanın möhtəşəm mahnı ənənələri əsasında yeni poetik özünüifadə forması yaratdığına görə" verilib.

Qeyd edək ki, qalib açıqlanandan sonra İsveç Akademiyası ədəbiyyat üzrə Nobel mükafatına layiq görülən Dilanla uzun müddət əlaqə saxlaya bilməmişdi. Bu fakt dünya mediasında günlərlə müzakirə mövzusuna çevrilmişdi. Bob Dilan özü də Nobel komitəsi ilə əlaqə yaratmamış, uzun müddət mövzu ilə bağlı susqunluq nümayiş etdirmişdi.

Komitə üzvlərinin onunla əlaqə yarada bilməməsi də ədəbiyyat həvəskarlarının marağına səbəb olmuşdu. Bəziləri Bob Dilanın mükafatı qəbul etməyəcəyini düşünürdü. Ancaq Bob saytında kitabı haqda məlumat verərkən özünü Nobel mükafatı laureatı kimi təqdim etməklə mükafatı qəbul etdiyini göstərmişdi.

Kəmalə