Ukrayna istehkamlar tikməyə başladı - İki şəhər təhlükədə

Ukrayna hakimiyyəti Xarkov vilayətindəki Balakleya və İzyum şəhərlərinin ciddi müdafiəsindən ötrü istehkamlar tikir.

Teleqraf.com xəbər verir ki, bu sözləri vilayətin regional hərbi idarəsinin rəisi Oleq Sinegubov deyib.

Onun sözlərinə görə, cəbhə xəttində istehkamların tikintisini nəzərə almaq üçün planlı tədbirlər həyata keçirilir. Balakleya və İzyum şəhərinin hərtərəfli müdafiəsi üçün hazırlıq işləri görülür.

Avqustun 2-də Nazirlər Kabinetinin Ali Radadakı nümayəndəsi Taras Melniçuk hökumətin Kiyevdəki istehkamlara əlavə 3,6 milyon dollar ayırdığını açıqlamışdı.

Xatırladaq ki, Ukraynanın bölgələrində istehkamların tikintisi çoxsaylı qalmaqallarla müşayiət olunur. Nikolayev və Volın vilayətlərində istehkamların tikintisində korrupsiya halları qeydə alınıb. Bir sıra hərbçilərin Xarkov vilayətində istehkam xətlərinin tam hazır olmaması barədə bəyanatlar verərək, Ukrayna Silahlı Qüvvələrinin bölgədə geri çəkilməsini bu halla əlaqələndirdikdən sonra növbəti qalmaqal yaranıb.

Ali Rada büdcə vəsaitlərinin təyinatı üzrə istifadəsini yoxlamaq üçün deputat komissiyası yaradıb.