HƏMAS girov götürdüyü israilli qızın videosunu yaydı
Fələstinin HƏMAS hərəkatı öz Telegram kanalında israilli girovun videosunu yayımlayıb.
Teleqraf.com xəbər verir ki, videoda əsirlərin taleyinin İsrail ordusunun Qəzza zolağını tərk edib-etməməsindən asılı olduğu bildirilir.
Özünü 19 yaşlı Liri Albaq kimi təqdim edən qız deyir: "Həyatda qalıb-qalmamağımız birbaşa ordunun girovların saxlanıldığı ərazilərdən çəkilib-çəkilməməsindən asılı olacaq. Mənimlə birlikdə girov götürülənlərdən biri İsrail ordusunun hücumu nəticəsində ağır yaralanıb. Hərbçilər girovların saxlandığı yerləri bombalayırlar. İsrail əsgərləri hərbi əməliyyatlarla girovları sağ-salamat azad edə bilməyəcəklər".
Videonun harada və nə vaxt çəkildiyi barədə məlumat yoxdur, lakin girov 450 gündən çox Qəzzada olduğunu bildirib.
2023-cü il oktyabrın 7-də Fələstin radikal HƏMAS hərəkatının silahlı tərəfdarlarının Qəzza zolağından İsrail ərazisinə soxulması, sərhəd yaşayış məntəqələrinin sakinlərinin öldürülməsi və 250-yə yaxın girov götürülməsindən sonra Yaxın Şərqdə vəziyyət kəskin şəkildə pisləşib.
