Hakan Fidan Suriyada kürd qüvvələrinə qarşı hərbi əməliyyatı istisna etmir

Türkiyənin xarici işlər naziri Hakan Fidan Suriyada fəaliyyət göstərən kürd silahlı qüvvələri irəli sürülən şərtləri yerinə yetirməsə, onlara qarşı hərbi əməliyyat keçirəcəyini istisna etmir.

Teleqraf.com xəbər verir ki, Fidan bu barədə CNN Türk telekanalına müsahibəsində danışıb.

“Biz dəqiq tələblər irəli sürdük. Əgər siz hərbi əməliyyat variantını istəmirsinizsə, o zaman xarici terrorçular Suriyanı, liderlər ölkəni tərk etməlidirlər, təşkilatın qalan üzvlər isə silahlarını yerə qoyub Suriyanın yeni administrasiyası ilə dialoq aparmalıdırlar. Dəməşq onlarla dialoq aparır. O, bir dəfə dedi, iki dəfə deyəcək. Ancaq heç bir nəticə olmasa, hərbi əməliyyat qanuni seçim olacaq", - deyə nazir efirdə bildirib.

O qeyd edib ki, Suriya Kürdüstan Fəhlə Partiyasının, eləcə də Ankaranın PKK-nın Suriya qolu hesab etdiyi Xalq Müdafiə Qüvvələrinin problemini həll etməlidir.

“Biz bu məsələ ilə uzun müddətdir məşğul olmuşuq. İndi Suriyadakı yeni reallıq kontekstində fərqli ssenariləri qiymətləndirərək işimizi davam etdiririk. İndi Suriyanın yeni administrasiyası açıq şəkildə bu problemi tanımalı və ölkəsinin milli təhlükəsizliyini və bütövlüyünü təmin etmək üçün lazımi addımları atmalıdır. Bu bizim gözləntimizdir. Bununla bağlı danışıqlar davam edir”, - deyə Fidan bildirib.