"Qarabağ"ı Bakıda məğlub edən klub baş məşqçisini qovdu

Fransanın "Lion" klubunun rəhbərliyi komandanın baş məşqçisi Pyer Sajı istefaya göndərib.

Teleqraf.com xəbər verir ki, bu barədə klubun rəsmi saytı məlumat yayıb.

45 yaşlı mütəxəssis "Lion"da 2023-cü ilin noyabrından çalışırdı.

Fransa klubu 5 oyundur qələbə qazana bilmir. Oyunların 2-də məğlubiyyət, 3-də heç-heçə qeydə alınıb. "Ağ-göylər" ölkə kubokunun 1/16 final mərhələsində V divizion təmsilçisi "Burquyin Jalye"yə uduzaraq mübarizəni dayandırıb.

Qeyd edək ki, "Lion" hazırda Fransa Liqa 1-in turnir cədvəlində 6-cı pillədə qərarlaşıb. Komandanın 19 oyundan 30 xalı var. UEFA Avropa Liqasının Liqa mərhələsinin V turunda "Lion" Tofiq Bəhramov adına Respublika stadionunda "Qarabağ"ı 4:1 hesabı ilə üstələyib.