Azərbaycanın yeni qazma quyusu Dubayda təqdim edildi

Sentyabrın 22-də Birləşmiş Ərəb Əmirliklərinin (BƏƏ) “Gulf Drilling Supply FZE” servis şirkətinin Azərbaycandakı törəmə müəssisəsi olan “Gulf Drilling Azerbaijan” yeni qazma qurğusunun təqdimatını keçirib.

Şirkətin sifarişi ilə Çində hazırlanan “ZJ-20” model qurğu ən son texnoloji yeniliklərdən istifadə olunaraq hazırlanıb və tam həcmdə xarici sərmayə hesabına maliyyələşdirilib. Qurğunun quruda yerləşən neft və qaz yataqlarında 2000-2400 metr dərinliyədək qazma, köhnə quyularda isə əsaslı təmir işlərini 4 min 500 metr dərinliyə qədər qazma imkanı var. Yeni qurğunun nominal qaldırma imkanı isə 120 ton təşkil edir. “ZJ-20” model qazma qurğusunun mühərrikinin gücü 450 kilovolt, yaxud da 610 at gücü, qüllənin hündürlüyü isə 35 metrdir.

Avqustun əvvəlində Azərbaycana gətirilən qurğu “Ramanı” yatağı ərazisində quyu qazılacaq ərazidə quraşdırılıb. Artıq şirkət qurğu üçün iş həcmini də müəyyənləşdirib. Qurğu ilkin olaraq "AzGerneft" MMC-nin sifarişi ilə qazma aparacaq. Bu müəssisə üçün bu il iki, gələn il isə dörd quyunun qazılması üçün sifariş alınıb. Qurğunun əsas üstünlüklərindən biri də yığcam və mobil olmasıdır.

"Gulf Drilling Azerbaijan" şirkətinin direktoru İlham Babayev bildirib ki, qurğunu sifariş etməzdən öncə şirkət bütün yenilikləri araşdırıb: "Bildiyiniz kimi, hər sifarişçinin öz tələbləri var. Biz də sifarişçilər arasında birillik və uzunmüddətli planları ilə bağlı sorğu apardıq. Sorğunun nəticəsində məlum oldu ki, bu tipli qurğu bizə lazımdır və bütün tələblər məhz bu qurğuda cəmləşib. Ona görə də böyük həcmdə sərmayə yatıraraq qurğunu sifariş verdik. Qurğu "Ramanı"da "AzGerneft" MMC üçün quyu qazılmasında istifadə olunacaq. Bununla belə, onu da qeyd edim ki, qurğu gələcəkdə təkcə "Ramanı"da deyil, digər ərazilərdəki yataqlarda da istifadə oluna bilər. Başqa şirkətlərdə də həmin dərinliyə uyğun yeni qurğu üçün iş olacağını düşünürük. Əminik ki, qurğu qısa müddətdə sərf olunmuş sərmayəni geri qaytara biləcək".

Qeyd edək ki, "Gulf Drilling Azerbaijan" şirkəti 2007-ci ilin sonunda fəaliyyətə başlayıb. Şirkət əsasən Azərbaycanın quruda yerləşən neft və qaz yataqlarında, Xəzərətrafı regionlarda müasir texnologiyaya əsaslanaraq neft, qaz və su quyularının qazılması və əsaslı təmiri xidmətinin göstərilməsi, neft hasilatının artırılması metodlarının tətbiqi ilə məşğul olur. Şirkətin əsas məqsədi neft sənayesində dünyanın qabaqcıl texnikası və texnologiyasını əldə etməklə öz maddi-texniki bazasının möhkəmləndirilməsi və ixtisaslı kadr potensialı hesabına dünya neft-qaz sənayesində qabaqcıl, rəqabət qabiliyyətli şirkətlərdən birinə çevrilməkdir.

"Gulf Drilling Azerbaijan" şirkətinin sifarişçiləri: "Suraxanı Oil" ƏŞ, “Balaxanı Oil” ƏŞ, "Bahar Energy" ƏŞ, "Qarasu" ƏŞ, "Gobustan" ƏŞ və "Binaqadi Oil" ƏŞ, "Shirvan Oil" ƏŞ, “Azərsu” ASC, habelə "AzGerneft" MMC.

2008-ci ildən 2015-ci ilin sentyabrın 1-dək şirkət Azərbaycanda "Suraxanı", "Binəqədi", "Mişovdağ", "Balaxanı", "Ramanı" neft və qaz yataqlarında və "Oğuz" su yatağında cəmi 207 quyu qazıb. Həmçinin, bu müddətdə "Kürovdağ", "Balaxanı", "Suraxanı", "Ramanı" yataqlarında 56 quyuda yan lülələrin qazılması əməliyyatları aparılıb. Ümumi qazma həcmi 236 min metrə çatır. Hazırda "Gulf Drilling Azerbaijan" şirkəti "Suraxanı", "Balaxanı", "Ramanı" neft yataqlarında ümumilikdə 5 quyuda qazma aparır.