“Məndən intiqam almağa çalışırlar” – Elmira Axundova

Milli Məclisinin üzvü, Xalq yazıçısı Elmira Axundova mətbuata müraciət edib.

Teleqraf.com xəbər verir ki, Elmira Axundova müraciətində son zamanlar ona və ailəsinə qarşı 5 il ərzində aparılan kampaniyanın yeni çirkin dalğasının başladığını bildirib:

“Həqiqətə uyğun olmayan saxta siyahılar, qanunsuz yolla əldə edilib, montaj olunmuş səs yazıları, ailənin şəxsi həyatı ilə bağlı oğurlanmış videogörüntülər mətbuatda sensasiya kimi təqdim olunur. Halbuki bu kompromatda heç bir yeni informasiya yoxdur. Bütün materiallar zamanında həm hüquq-mühafizə, həm də məhkəmə orqanlarına təqdim olunub və onların üzərində araşdırmalar aparılıb”.

Elmira Axundova qeyd edib ki, görünür, illər öncə olub-bitmiş bir məsələni yenidən gündəmə gətirmək hansısa maraqlı və məkirli qüvvələrə sərf edir: “Əsas hədəf əlbəttə ki, mənim şəxsiyyətim, cəmiyyətdəki mövqeyim və işgüzar nüfuzumdur. Bu ilin 11 aprel tarixində ölkəmizdə baş tutan Prezident seçkilərinin təbliğat- təşviqatı dönəmində radikal müxalifəti, "Meydan TV" kimi internet kanalının, eyni zamanda bu sayaq xəbər portallarının arxasında gizlənən dağıdıcı qüvvələri kəskin tənqid etmişəm. Xarici mərkəzlərin ruporuna çevrilən bu cür qüvvələrə qarşı 20 ildən çoxdur ki, mübarizə aparıram. Yerli və xarici mətbuatda bu mövzuda onlarla məqaləm və çıxışım dərc olunub. Görünür, məhz buna görə məndən "intiqam" almağa çalışırlar. Mənə Xalq Yazıçısı yüksək adı veriləndən sonra sosial şəbəkələrdə və eləcə də müxalifət mətbuatında mənə qarşı heç bir mənəvi və əxlaqi ölçülərə sığmayan "qara-piar" kampaniyasına başladılar. Maraq doğuran məqam odur ki, radikal müxalifətlə təmasda olan, onlarla əməkdaşlıq edən Fərman Məmmədov və onun əlaltıları bu kampaniyanı o vaxt yenidən başladılar ki, artıq onları maraqlandıran iş üzrə məhkəmə prosesi yekunlaşmaq üzrə idi”.

Millət vəkili əgər sübut-dəlilləri varsa, onları hüquq-mühafizə orqanlarına təqdim etməyi məsləhət bilib: “Bu işlərə mətbuatı qatmaq, gizlin yolla əldə olunub, montaj edilmiş səs yazılarını, şəxsi həyata dair videoyazıları, təhrif edilmiş və ya reallığı əks etdirməyən mülkiyyət siyahılarını mediaya ötürmələrini məhkəmə orqanlarına kobud təzyiq kimi qiymətləndirirəm. 20 il mətbuatda jurnalist kimi çalışmışam. İndi də mətbuata, media nümayəndələrinə hörmətim böyükdür və daim jurnalistlərlə əlaqədəyəm. Hər zaman lazımi sorğu və suallarını cavablandırıram”.

Elmira Axundova qeyd edib ki, bəzi mətbu orqanlar, işin mahiyyətini anlamadan, məsələnin məğzini dəqiqləşdirmədən, ucuz sensasiya xatirinə Fərman Məmmədovun dezinformasiyalarını tirajlayırlar və bu kampaniyanın iştirakçılarına çevrilirlər: “Biz hüquqi və demokratik cəmiyyətdə yaşayırıqsa, yuxarıda sadalanan faktlara ancaq hüquqi müstəvidə qiymət verilməlidir. Ona görə, hamıdan məhkəmənin qərarını gözləməyi xahiş edirəm”.

Ədəbi və siyasi fəaliyyətimə gəlincə millət vəkili bildirib ki, onu dövlətçilik yolundan, dahi Heydər Əliyevin yolundan heç kim və heç nə döndərə bilməz: “Vaxtilə Yazıçıların qurultayında Ümummilli Liderimiz demişdir ki, Elmira Axundova çox dəyərli bir insandır. Mən də hər zaman çalışmışam ki, bu yüksək qiyməti, etimadı doğruldum. Hesab edirəm ki, mənə olan inamı, etibarı indiyə qədər doğrultmuşam, bundan sonra da doğruldacağam. Buna heç kimin şübhəsi olmasın”.

Bundan başqa, Azərbaycan Yazıçılar Birliyinin Ağsaqqallar Şurası da məsələ ilə bağlı bəyanat yayıb.

Bildirilir ki, görkəmli qələm sahibi, Xalq yazıçısı, Dövlət mükafatı laureatı, Milli Məclisin deputatı, Əfv Komissiyasının üzvü Elmira Axundova Yazıçılar Birliyinin Ağsaqqallar şurasının da üzvüdür: “Son zamanlar bəzi mətbuat səhifələrində və saytlarda yazıçı-deputata qarşı yönəlmiş qaralama kompaniyasına öz münasibətmizi bildirməliyik. İstedadlı publisist Elmira Axundova həmişə dövlətçiliyimizin möhkəmlənməsinə, milli maraqlarımızın təbliğinə, mənəvi dəyərlərimizin qorunmasına xidmət edib. Ulu Öndərə minnətdarlığını və sədaqətini Elmira Axundova Heydər Əliyevə həsr olunmuş çoxcildliklərində ifadə etmişdir və bu kitablar bir çox xarici ölkədə də nəşr edilib”.

“Görünür müəyyən qüvvələr bütün bunları Elmira xanıma bağışlaya bilmir və onu hər cür ləkələməyə çalışırlar. Mediada yer alan faktlarda həqiqət varsa mətbuata yox, məhkəmə-istintaq orqanlarına müraciət edilməliydi. Məhz ancaq müəyyən media vasitələrindən istifadə olunması belə faktların həqiqətə uyğun olmamasına dəlalət edir. Şübhəli və qanunsuz yollarla əldə edilmiş, montaj olunmuş kompramatlardan istifadə edilərək ictimaiyyətə süni sensasiya təqdim olunur. Elmira xanıma yönəldilən ittihamlara hüquq daxilində qiymət verilməlidir. Məhkəmənin qərarı olmadan nüfuzlu ziyalıya, deputat-yazıçıya qarşı belə qaralama, ləkələməli kompaniyası fikrimizcə yol verilməzdir. Azərbaycan Yazıçılar Birliyinin Ağsaqqallar Şurası həmkarımız, Xalq yazıçsı, Şuramızın üzvü Elmira Axundovaya qarşı bu çirkin kompaniyaya son qoyulmasını tələb edir”, - deyə bəyanatda bildirilir.