AYB-nin 13-cü qurultayı başa çatdı

Azərbaycan Yazıçılar Birliyinin XIII qurultayında 4 komissiya təyin olunub, sədr və üzvləri seçilib.

Teleqraf.com xəbər verir ki, qurultay katibliyinin sədri Adil Cəmil, üzvləri isə Arifə Əliyeva, Ramiz Qusarçaylı, Qafar Cəfərli, Taleh Mənsur olub.

Mandat komissiyasının sədri Əkbər Qoşalı, üzvlər isə Gülnarə Əmaləddin, Nazim Əhmədli, Akif Əhmədgil, Şahin Musaoğlu, mətbuat xidmətinin rəhbəri Elçin Şıxlı, üzvlər isə Xəyal Rza, Alina Talıbova, Şahanə Müşfiq, Ulucay Akif, seçki komissiyasının sədri Səyyad Aran, üzvlər isə Elxan Elatlı, Saday Budaqlı, Orxan Fikrətoğlu və Cavid Zeynallı seçilib.

***

11:01

Azərbaycan Yazıçılar Birliyinin (AYB) XIII Qurultayı keçirilir.

Teleqraf.com xəbər verir ki, Qurultayda AYB-nin dəvətilə Türkiyə, Rusiya, Litva, İsrail, Pakistan, Gürcüstan, Almaniya, İraq, Belarus və İrandan 20-dən çox qonaq iştirak edir.

Qurultayda AYB-nin sədri vəzifəsinə seçki keçiriləcək. Birliyin sədrliyinə üç namizədin adı məlumdur. Onlar Xalq yazıçısı Anar Rzayev, şairlər Emil Rasimoğlu və Fuad Cəfərlidir.

XIII qurultaya AYB rəhbərliyi – 6 nəfər (sədr Anar, birinci katib Çingiz Abdullayev, sədrin müavini Rəşad Məcid, katiblər Elçin Hüseynbəyli, Səlim Babullaoğlu, İlqar Fəhmi), Ağsaqqallar Şurasının üzvləri – 19 nəfər, İdarə Heyətinin üzvləri – 24 nəfər, Gənclər Şurasının üzvləri – 21 nəfər, seksiya rəhbərləri – 6, bölmə rəhbərləri – 19 və bölmələrdən və seksiyalardan seçilənlər də əlavə olunmaqla ümumilikdə 330 nəfər nümayəndə müəyyənləşib.

AYB-nin hazırki sədri Xalq yazıçısı Anar Rzayevdir.

09:29

Bu gün 8 illik fasilədən sonra Azərbaycan Yazıçılar Birliyinin 13-cü qurultayı baş tutacaq.

Teleqraf.com xəbər verir ki, qurultay Azərbaycan Dövlət Akademik Milli Dram Teatrında keçiriləcək.

İlk olaraq AYB-nin İdarə Heyətində təmsil olunan bir qrup şəxs Birinci Fəxri Xiyabanda ümummilli lider Heydər Əliyevin məzarını, daha sonra Şəhidlər Xiyabanını ziyarət edəcək.

Fəxri və Şəhidlər Xiyabanında əklilqoyma mərasimindən sonra Azərbaycan Dövlət Akademik Milli Dram Teatrında qurultay nümayəndələrinin saat 10:00-da qeydiyyatı başlayacaq. Qurultayın saat 11:00-da öz işinə başlayacağı vurğulanır.

Qurultayın iş qrafiki iki hissəli çıxışlardan ibarət olacaq. Bundan sonra qurultayda AYB -yə yeni sədrin və qurumun icraedici strukturunun tərkibinin yenilənməsi üçün səsvermə keçiriləcək.

Qeyd edək ki, AYB-nin 13-cü qurultayı 3 il gecikmə ilə baş tutur.