DİN-dən polis rəisinin cəzalandırılması ilə bağlı məsələyə reaksiya

DİN Ağcabədi Rayon Polis Şöbəsinin rəisi cəzalandırılması üçün təqdimat göndərilməsi məsələsinə reaksiya verib.

Teleqraf.com xəbər verir ki, DİN Mətbuat Xidmətinin əməkdaşı Nurlan Əliyev Ağcabədi Rayon Polis Şöbəsinin rəisinin guya cəzalandırılması ilə bağlı yayılan məlumatın həqiqəti əks etdirmədiyini deyib.

Polis orqanının rəisinin intizam məsuliyyətinə cəlb edilməsi yalnız ölkənin daxili işlər nazirinin səlahiyyətinə aiddir. Odur ki, əminliklə deyə bilərəm ki, Ağcabədi Rayon Polis Şöbəsinin rəisi barədə hər hansı tənbeh növü tətbiq edilməyib.

***

Ağcabədi Rayon Polis Şöbəsinin rəisi cəzalandırıla bilər.

Bu barədə İnsan Haqları üzrə Müvəkkilin (Ombudsman) ötən ilin yekunlarına dair hesabatında bildirilib.

Hesabatda qeyd edilir ki, ərizəçi Ombudsmana müraciət edərək, övladının Ağcabədi Rayon Polis Şöbəsinin əməkdaşları tərəfindən üç gün həmin şöbədə qanunsuz olaraq saxlanıldığını və bu müddət ərzində pis rəftara məruz qaldığını bildirib, məsələnin obyektiv araşdırılmasında və həmin polis əməkdaşları barəsində qanuni tədbirlərin görülməsində köməklik göstərilməsini xahiş edib.

Şikayətlə bağlı Azərbaycan Respublikasının Baş Prokurorluğuna ünvanlanmış müraciətə verilmiş cavabda inzibati həbs nəzərdə tutan inzibati xəta haqqında protokol tərtib edildikdən dərhal sonra məhkəməyə göndərmədiyi üçün Ağcabədi Rayon Polis Şöbəsinin rəisi barəsində İnzibati Xətalar Məcəlləsinin 596.2-ci maddəsi ilə inzibati icraat başlanaraq vəzifəli şəxsin intizam məsuliyyətinə cəlb edilməsi üçün aidiyyəti üzrə Azərbaycan Daxili İşlər Nazirliyinə təqdimat göndərildiyi bildirilib.