“Beynəlxalq radio” və “CBC FM”ə yayım üçün radiotezliklər ayrıldı

Beynəlxalq radio”nun ümumölkə yayımı üçün və “CBC FM”-in regional yayımı üçün radiotezliklər ayrılıb.

Teleqraf.com xəbər verir ki, bu barədə Audiovizual Şuranın yaydığı məlumatda deyilir.

Qeyd edilib ki, Azərbaycan Respublikası Audiovizual Şurasının bu gün keçirilən növbəti iclasında boş və istifadəyə yararlı radiotezliklərin ayrılması məsələsi müzakirə olunub.

Audiovizual Şuranın müvafiq qərarları ilə "Azərbaycan Beynəlxalq Radiosu"nun ümumölkə yayımının təmin edilməsi üçün "Bakı Teleqüllə Kompleksi"ndən 92,5 MHs, "Şuşa" RTYS-dan 89,2 MHs, "Astara" RTYS-dan 95,2 MHs, "Yalama" (Xaçmaz rayonu) RTYS-dan 97,4 MHs, "Danaçı" (Zaqatala rayonu) RTYS-dan 98,0 MHs radiotezlikləri ümumölkə yerüstü radio yayımçısı "Azərbaycan Televiziya və Radio Verilişləri" QSC-nin, habelə "CBC FM"-in Qarabağda və Şərqi Zəngəzurda yayımının genişləndirilməsi məqsədilə "Şahyeri" (Xocavənd rayonu) RTYS-dan 93,8 MHs radiotezliyi regional yerüstü radio yayımçısı "Caspian İnternational Broadcasting Company" MMC-nin istifadəsinə ayrılıb.