Abşeronda qısqanc oğlan sevdiyi qızın boğazını kəsdi –CİNAYƏT İŞİ

Bu gün Bakı Ağır Cinayətlər Məhkəməsində yaşadığı qadını öldürməyə cəhd edən 1984-cü il təvəllüdlü Seymur Bayramovun cinayət işi üzrə məhkəmə prosesi başa çatıb.

Teleqraf.com xəbər verir ki, bu ilin yanvarın 28-də Abşeron rayonunda 1988-ci il təvəllüdlü Ülviyyə İsmayılova boğaz və kürək nahiyəsindən aldığı çoxsaylı bıçaq xəsarətləri ilə təcili tibbi yardım stansiyasına gətirilib. Onun üzərində cərrahiyyə əməliyyatı keçirilib və yaralı reanimasiyaya yerləşdirilib.
Hadisə ilə bağlı dərhal polisə məlumat verilib.

Məlum olub ki, 28 yaşlı Ülviyyə İsmayılovanı qeyri-rəsmi nikah münasibətində yaşadığı 1984-cü il təvəllüdlü Seymur Bayramov bıçaqlayıb.

Abşeron rayonu Quşçuluq yaşayış massivində yaşayan Seymur Bayramov bu ilin yanvarın 28-də Ülviyyə İsmayılovanın yaşadığı binanın yaxınlığına gəlib.

Burada, yəni 28-ci məhəllə, 10 saylı binanın qarşısında o, qadına hücum edib. 29 yaşlı oğlan gənc qızın boğazına və kürək nahiyəsinə çoxsaylı bıçaq xəsarətləri yetirərək onu öldürməyə çalışıb. Lakin ətrafda adamların olduğunu görən Seymur Bayramov ərazidən uzaqlaşıb. Hadisə qısqanclıq zəminində baş verib.
Hakim Fikrət Qəribovun sədrliyi ilə keçirilən prosesdə hökm oxunub.

Məhkəmənin hökmü ilə Seymur Bayramov 11 il müddətinə azadlıqdan məhrum edilib.

Hacı Zeynalov