Direktorun "kredit" məhkəməsi keçirildi

İradə Murğuzova yenidən məhkəməyə verilir

Bu gün Xətai rayon Məhkəməsində rayonunun 171 saylı orta məktəbinin direktoru İradə Murğuzovanın banklardan müəllimlərin və digər işçilərin adına külli miqdarda kredit götürməsi ilə bağlı hazılıq iclası keçirilib.

Teleqraf.com xəbər verir ki, məktəbin müəllimi Mədinə Tağıyevanın İradə Murğuzovaya qarşı qaldırdığı iddia üzrə keçirilən iclasa direktor gəlməyib. Bu üzdən iclas avqustun 29-a təyin olunub.

Mədinə Tağıyevanın hüquqi nümayəndəsi Teymur Rza Teleqraf.com-a bildirib ki, direktor məhkəməyə teleqram vuraraq, xəstə olduğunu qeyd edib: “Mədinə Tağıyevaya məktəbin dərs hissə müdiri Leyla müəllimə zəng edib, ərizəsini geri götürməsini istəyib. Mədinə xanım da etiraz edib. O, direktor tərəfindən təhqir və böhtana məruz qaldığına görə, hətta təzminatın məbləğini 100 min manata qaldırıb və direktordan təhqirlərinə görə, təkzib verməsini tələb edib”.

Teymur Rza onu da bildirdi ki, direktorun “kredit əməliyyatı”na görə məktəbin digər müəllimi Kifayət Rzayeva da İradə Murğuzovanı məhkəməyə verəcək: “Direktor demişdi ki, qarşılıqlı iddia ərizəsi verəcək. Hansı əsasla? Fakt göz qarşısındadır. Direktor etdiyi əmələ görə, qanun qarşısında cavab verməlidir. İradə Murğuzova “İç xəbər”də efirdən də təsdiqlədi ki, kreditlə bağlı müəllimdən pul götürüb”.

Məsələ ilə əlaqədar Təhsil Nazirliyinə müraciət etdiyini deyən həmsöhbətimiz bildirdi ki, nazirlik bu məsələni Bakı Şəhəri üzrə Təhsil İdarəsinə həvalə etsə də, onlara hələ ki, heç bir məlumat verilməyib.

SEVİL