“Sosial şəbəkədə kişi ilə danışırdı” – Arvadını yandıran ər danışdı

Bakıda arvadını öldürməkdə təqsirli bilinən Məsud Müzəffərovun cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Zeynal Ağayevin sədrliyi ilə baş tutan prosesdə prokuror ittiham aktını elan edib.

İttihama görə, bu il aprelində paytaxtın “Memar Əcəmi” metrostansiyasının yaxınlığında yerləşən “Manat Shop” mağazasında Müzəffər Müzəffərov həyat yoldaşı Aytəkin Müzəffərovanın başına benzin tökərək yandırıb. Nəticədə qadın dünyasını dəyişib.

Müəyyən edilib ki, qətl qısqanclıq zəminində törədilib.

Aytəkin Müzəffərova hadisədən bir qədər əvvəl işləmək üçün Türkiyəyə gedib. Bu səbəbdən Müzəffər arvadının ona xəyanət etdiyini fikirləşib. Bir neçə aydan sonra Aytəkin Bakıya qayıdıb və həmin mağazada işləməyə başlayıb.

Hadisə baş verən günü Məsud Müzəffərov 1 litr benzin götürərək arvadının çalışdığı mağazaya gəlib. O, həmin yerdə benzini qadının başına tökərək yandırıb. Qadın hadisə yerində dünyasını dəyişib.

İstintaq orqanı tərəfindən Məsud Müzəffərovun barəsində Cinayət Məcəlləsinin 120.2.2-ci (xuliqanlıq niyyəti ilə adam öldürmə) maddəsi ilə ittiham elan edilib.

Məsud Müzəffərov elan olunmuş ittiham üzrə özünü təqsirli bilib. O, bildirib ki, keçmiş arvadı başqa şəxslə telefonda danışıb. O, bunu özünə xəyanət kimi qəbul etdiyini deyib.

Bildirib ki, keçmiş arvadı sosial şəbəkədə başqa bir kişi ilə danışdığını bilib: “Bunu araşdırdım və həmin danışdığı adamı tapdım. Sonra boşanmaq üçün məhkəməyə müraciət etdim. Bu səbəbdən boşandıq”.

Məsud Müzəffərov deyib ki, Aytəkin Müzəffərovanı öldürmək niyyəti olmayıb: “Aytəkin rayondan paytaxta gəldi, qohumu evində yaşamağa başladı. Bu hərəkəti məni daha da əsəbləşdirdi. Fikirləşdim ki, onunla danışım, belə hərəkət etməsinin səbəbini soruşum. Bu məqsədlə onun işlədiyi mağazaya gəldim. Orada mübahisə etdik, benzini üstünə tökərək, yandırdım. Onun ölməsini istəmirdim. Məqsədim onun üzünü yandırıb, tanımaz hala salmaq idi”.