Məhəmməd İmanlının cinayət işindən yeni xəbər

Ali Məhkəmədə Bakı Dövlət Universitetinin hüquq fakültəsinin sabiq dekan müavini, hüquq elmləri doktoru, professor Məhəmməd İmanlının kasasiya şikayətinə baxılıb.

Teleqraf.com xəbər verir ki, Məhəmməd İmanlının bəraət istəməsi ilə bağlı Bakı Apelyasiya Məhkəməsinin qərarından verdiyi kasasiya şikayətinə hakim İmran Haqcıqayıbovun sədrlik etdiyi kollegiyada baxılıb. Məhkəmənin qərarı ilə Məhəmməd İmanlının kasasiya şikayəti təmin edilməyib.

Qeyd edək ki, BDU hüquq fakültəsi “Cinayət hüququ və kriminalogiya” kafedrasının müəllimi, hüquq elmləri doktoru, professor əvəzi Məhəmməd İmanlı ikinci ali təhsil almaq üçün ona müraciət etmiş Bakı şəhər sakini Ziyad Süleymanovdan BDU-nun Beynəlxalq iqtisadi əlaqələr fakültəsinə tələbə kimi qəbul edilməsinə görə 40.000 (qırx min) manat pul tələb edərək, 05 may 2012-ci il tarixdə yaşadığı Bakı şəhəri, Zabrat qəsəbəsi, A.S.Puşkin küçəsi 6 №-li evdə qeyd olunan külli miqdarda pulu rüşvət kimi alarkən cinayət başında yaxalanıb.

Məhəmməd İmanlı Cinayət Məcəlləsinin 311.3.3-cü (külli miqdarda rüşvət alma) maddəsi ilə ittiham olunub. Lakin Bakı Ağır Cinayətlər Məhkəməsində işə baxan hakimlər onun əməlində Cinayət Məcəlləsinin 178-ci (dələduzluq) maddəsi ilə cinayət tərkibi görüb. O, məhkəmənin hökmü ilə 3 il müddətinə azadlıqdan məhrum edilib. Məhəmməd İmanlı hökmdən apelyasiya şikayəti versə də, cəzası dəyişdirilməyib.

O, cəzasını çəkmək üçün ümumi rejimli cəza çəkmə müəssisəsinə göndərilib. Sabunçu rayon Məhkəməsinə müraciət edən Məhəmməd İmanlının işinə baxılıb. Məhkəmə onun cəzasının qalan hissəsini məntəqə tipli cəzaçəkmə müəssisəsində çəkməsi barədə qərar qəbul edib. Məhkəmənin qərarından prokurorluq narazı qalıb və apelyasiya protesti verib. Prokurorluğun protestində Məhəmməd İmanlının həbs edilməsi tələb olunub. Bakı Apelyasiya Məhkəməsində hakim Vaqif Mursaqulovun sədrliyi ilə keçirilən prosesdə Məhəmməd İmanlının həbs edilməsi ilə bağlı verilən şikayət təmin edilməyib.

Hacı Zeynalov