İstirahət günləri baş verən qəzaların statistikası: 11 ölü, 13 yaralı

Respublikanın avtomobil yollarında 11 yol-nəqliyyat hadisəsi baş verib.

Teleqraf.com xəbər verir ki, nəticədə 11 nəfər ölüb, 13 nəfər yaralanıb.

Neftçala rayonunun Boyat kəndində ölümlə nəticələnən yol nəqliyyat hadisəsi baş verib. Masallı rayon sakini Vidadi Tağıyev idarə etdiyi “VAZ-2101” markalı avtomobili aşırıb və hadisə yerində ölüb.

Daha bir yol nəqliyyat hadisəsi Saatlı şəhərində baş verib. Şəhər sakini Eldar Mirzəyev idarə etdiyi “QAZ-33021” markalı avtomobillə yolu keçən həmyerlisi Qulaməli Əvəzovu vurub, nəticədə piyada hadisə yerində ölüb.

Binəqədi rayonunun Azadlıq prospektində Bakı şəhər sakini Vidadi Məhərrəmov idarə etdiyi “Toyota” markalı avtomobillə yolu keçən 30-35 yaşlı kişini vurub. Xəstəxanaya yerləşdirilmiş həmin şəxs orada ölüb.

Daha bir yol qəzası Tovuz rayonunun Qaraxanlı kəndində qeydə alınıb. Kənd sakini Rəsul Süleymanov idarə etdiyi “Mercedes” markalı avtombili yolun kənarında dayanmış həmkəndlisi Zeynalabdin Zeynalova məxsus “KamAZ” markalı avtomobilə vurub.

Nəticədə R.Süleymanov və sərnişinlərindən həmyerliləri Murad Əliyev, Ehtiram Quliyev hadisə yerində ölüb, xəsarət almış digər sərnişini İbrahim Əsədov xəstəxanaya yerləşdirilib.

Tovuz rayonunun Əsrik Cırdaxan kəndində rayon sakini Süleyman Tağıyev idarə etdiyi “VAZ-2107” markalı avtomobili aşırıb. Xəstəxanaya yerləşdirilmiş S.Tağıyev orada ölüb.

Avqustun 30-da saat 13 radələrində Xəzər rayonunun Buzovna qəsəbəsində Bakı şəhər sakini Elxan Əhmədov idarə etdiyi “Mercedes” markalı avtomobillə yolu keçən qəsəbə sakini Sadiq Gülüşovu vurub. Piyada xəstəxanaya aparılarkən yolda ölüb.

Hacı Zeynalov