Yeddi günlük kitab sərgisi: 120 min ziyarətçi gözlənilir - Bu məşhurlar da qatılacaq

Mədəniyyət Nazirliyinin təşkilatçılığı ilə keçirilən 10-cu Bakı Beynəlxalq Kitab Sərgisi ilə bağlı mətbuat konfransı baş tutub.

Teleqraf.com xəbər verir ki, Mədəniyyət Nazirliyinin Media və kommunikasiya şöbəsinin müdiri Aynur Kərimova 10-cu Bakı Beynəlxalq Kitab Sərgisinin əhəmiyyətindən danışıb:

"Sərginin baş tutması çox gözəl haldır. İldən-ilə yaradıcı və maliyyə baxımından imkanları gözəlləşir. Ziyarətçilərimizin "Elmlər Akademiyası", "28 May", "Koroğlu" metrostansiyalarından Bakı Ekspo Mərkəzinə xüsusi avtobuslar vasitəsilə gediş-gəlişi pulsuz təmin ediləcək.

Ötən il sərgidə 75 min ziyarətçi iştirak etmişdi. Bu il isə 120 min ziyarətçinin iştirakı gözlənilir. Bunların sırasında daha çox gənclər təşkil edir".

Mədəniyyət Nazirliyinin kitab sənayesi şöbəsinin müdiri Akif Marifli isə vurğulayıb ki, iki gün sonra 10-cu Bakı Beynəlxalq Kitab Sərgisi öz işinə başlayır: "Sərgi 2-8 oktyabr tarixlərində baş tutacaq.10-cu Bakı Beynəlxalq Kitab Sərgisi Məhəmməd Füzulinin 530 illik yubileyinə həsr edilib. Sərgi bu il 7 gün nəzərdə tutulub. Sərgidə 18 ölkədən 58 xarici təşkilat, 110 yerli nəşriyyat-poliqrafiya və kitab sənəti ilə əlaqəli müəssisə iştirak edəcək.

Sərginin fəxri yazarları Salam Sarvan, Rövşən Abdullaoğlu olacaq. Sərginin fəxri qonaqları isə dünya şöhrətli irland yazar Con Boyn və alman yazar Vulf Dorndur. Eyni zamanda sərgidə Türkiyə, İtaliya, Çin, Rusiya, Koreya, Macarıstan, Qazaxıstan, Qətər, Özbəkistan, Oman, Argentina, Mərakeş, Venesuela, Gürcüstan, Meksika, Kolumbiya, Çili, Monqolustan kimi ölkələrin yazıçıları da iştirak edəcəklər. Sərgi ziyarətçilərimiz üçün unudulmaz olacaq. Hər kəsi sərgiyə dəvət edirik".

Yazıçı Rövşən Abdullaoğlu Beynəlxalq Kitab Sərgilərinin önəmi haqqında danışıb: "Yazıçı üçün kitab sərgilərin əhəmiyyəti böyükdür. Dünya bazarına çıxmaq istəyiriksə, beynəlxalq sərgiləri aktivləşdirməliyik".

"Qanun" nəşriyyatının direktoru Şahbaz Xuduoğlu isə 10-cu Bakı Beynəlxalq Kitab Sərgisində kitabları 90-70 və 30 faiz endirimlə ziyarəçilərə təklif ediləcəyini vurğulayıb.

Qeyd edək ki, 10-cu Bakı Beynəlxalq Kitab Sərgisi Bakı Ekspo Mərkəzində 2-8 oktyabr tarixlərində saat 10:00-dan 20:00-dək davam edəcək.