"Oyunlardan sonra əlaqələrimiz daha da genişlənəcək"

"Bakı-2015" Birinci Avropa Oyunlarının ölkəmiz üçün əhəmiyyəti çox böyükdür.

Bu Oyunlar təkcə idmanımızı deyil, Azərbaycanı bütün dünyada tanıtdırmaq məqsədi daşıyır".

Bu sözləri Teleqraf.com-a açıqlamasında xalq artisti Həmidə Ömərova deyib. O bildirib ki, Avropa Oyunlarına dövlətimiz və xalqımız səylə, əzmlə hazırlaşır: "Hesab edirəm ki, Azərbaycanı tanıtdırmaq üçün bu kimi tədbirlərin keçirilməsi böyük və gözəl ənənədir. Mənə elə gəlir ki, bu ənənə davam edəcək. Digər tərəfdən Avropa Oyunları Azərbaycanda ilk dəfə keçirilir və biz buna görə çox sevinməliyik. Bu tarixdə hər zaman qalan və xatırlanan hadisə olacaq. Bizim dövlətimiz, xalqımız, idmançılarımız xeyli vaxtdır ki, bu oyunlara çox ciddi hazırlaşır. Burda başqa məsələ Avropa Oyunlar zamanı ölkəmizə gələcək olan çoxlu sayda insanlarla bağlıdır. Bunların arasında jurnalistlər, idmançılar, habelə turistlər olacaq. O turistlər ki, həm ölkəmizi tanıpyacaqlar, həm də sevdikləri idman yarışlarında izləyici kimi iştirak edəcəklər. Bilirsiniz, Azərbaycanda bu cür gözəl tədbirin keçirilməsi istər-istəməz bütün dünyada əks-səda doğuracaq. Və bütün ölkələr Azərbaycanda keçiriləcək oyunları canlı olaraq öz televiziya kanallarında nümayiş etdirəcəklər. Təbii ki, idman yarışları arasında reklamlar olacaq ki, bu zaman ölkəmizin görməli yerləri o kadrlarda əks olunacaq. Ölkəmizə gələnlər Azərbaycan xalqının qonaqpərvərliyini görəcəklər. Bu illər ərzində Azərbaycan haqda bədnam qonşularımızın dedikləri fikirlər tam alt-üst olacaq. Çünki bizim xalqımız çox qonaqpərvər, beynəlxalq xalqdır. Azərbaycanın beynəlxalq əlaqələri genişdir və güclüdür. Bu oyunlardan sonra beynəlxalq əlaqələrimiz daha da genişlənəcək".

Nərmin