Aydın Mirzəzadə: “Bu hərəkət Elnura başucalığı gətirdi” - VİDEO

Milli Məclisin deputatı Aydın Mirzəzadə ötən gün Vyanada keçirilən “Eurovision 2015” mahnı müsabiqəsində Azərbaycanı təmsil edən Elnur Hüseynovun ikinci qrupdan finala vəsiqə qazanmasına münasibət bildirib.

Publika.az-ın məlumatına görə, deputat A.Mirzəzadə deyib ki, ötən gün Avstriyanın paytaxtı Vyana şəhərində keçirilən “Eurovision 2015” mahnı müsabiqəsinin ikinci qrupundan finala vəsiqə qazanan 10 ölkənin təmsilçiləri mətbuat konfransı keçiriblər: “Konfransda finala vəsiqə qazanan Elnur Hüseynov da iştirak edirdi.

Azərbaycandan olan media nümayəndəsi ondan hisslərini mahnı ilə ifadə etməsini istəyib. Təmsilçimiz isə bundan imtina edib: “Bu an xoşbəxt və şən mahnı oxuya bilmərəm. Çox kədərliyəm. Bunun üçün səbəbim var. Azərbaycanlılar məni başa düşər”.

Təmsilçimizin konfransda mayın 19-da Bakıda baş verən faciə ilə əlaqədar sinəsinə qara lent taxması da diqqətdən qaçmayıb.

Elnurun bu hərəkəti ona başucalığı gətirdi və gözümüzdə bir daha ucaldı”.