18 Sentyabr 2014 13:23
732
12 Punto 14 Punto 16 Punto 18 Punto

Prezident İlham Əliyev Monteneqronun baş naziri Milo Cukanoviçin rəhbərlik etdiyi nümayəndə heyətini qəbul edib.

Teleqraf.com xəbər verir ki, əvvəlcə prezident İlham Əliyevin baş nazir Milo Cukanoviçlə təkbətək görüşü olub.

Görüşdə iki ölkə arasında ikitərəfli münasibətlərin inkişafından məmnunluq ifadə edilib, əlaqələrin müxtəlif istiqamətlərdə, o cümlədən enerji, infrastruktur, bank sektoru, turizm, təhsil və digər sahələrdə inkişafı üçün yaxşı potensialın olduğu vurğulanıb.

Sonra görüş geniş tərkibdə davam etdirilib.

Dövlət başçısı Azərbaycanla Monteneqro arasında ikitərəfli dostluq münasibətlərinin müxtəlif sahələri əhatə etməsindən və dinamik inkişafından məmnunluğunu ifadə edib. Əməkdaşlığın genişləndirilməsi məsələsinə toxunan prezident İlham Əliyev iki ölkə arasında qarşılıqlı ticarət əlaqələrinin inkişaf etdirilməsi üçün də yaxşı imkanların olduğunu vurğulayıb. İkitərəfli münasibətlərin inkişafında yüksək səviyyəli qarşılıqlı səfərlərin önəmini qeyd edən dövlət başçısı Monteneqronun baş naziri Milo Cukanoviçin rəhbərlik etdiyi nümayəndə heyətinin Azərbaycana səfərinin əlaqələrin inkişafı ilə bağlı məsələlərin müzakirəsi baxımından əhəmiyyətini diqqətə çatdırıb.

Baş nazir Milo Cukanoviç Azərbaycan Prezidentinin Monteneqroya olan dostluq münasibətinə görə minnətdarlığını bildirib. Ötən dövr ərzində Azərbaycanda gedən sürətli inkişaf proseslərinin şahidi olduğunu vurğulayan baş nazir bu inkişafın onda dərin təəssürat yaratdığını deyib və əldə olunan nailiyyətlər münasibətilə dövlət başçısını təbrik edib. M.Cukanoviç öz növbəsində Azərbaycanla Monteneqro arasında ikitərəfli münasibətlərin inkişafının razılıq doğurduğunu vurğulayıb.

Səxavət


Müəllif: