"Qarabağ" sabiq hücumçusunu geri qaytara bilər

“Sabiq hücumçulardan İbrahim Vadjiyə diqqət ayırmamışıq. Amma hazırda Vadjidən başqa hücumçulara baxırıq”.

Teleqraf.com xəbər verir ki, bu sözləri “Qarabağ”ın baş məşqçisi Qurban Qurbanov “Şamaxı” ilə oyundan sonra mətbuat konfransında deyib.

Qurbanov Juninyonun gedişindən sonra yeni transferin klubun sabiq oyunçulardan seçilməsinin mümkünlüyündən danışıb:

“Qış hazırlığı müddəti qısa oldu. Juninyonun getməsi tezəliklə baş tutdu. Hazırda oyunçu götürməyimiz üçün limitin fərqi yoxdur. İstədiyimiz mövqelərə bəyəndiyimiz oyunçular olsa, mütləq gətirəcəyik. Sabiq hücumçulardan İbrahim Vadjiyə diqqət ayırmamışıq. Amma hazırda Vadjidən başqa hücumçulara baxırıq. O da siyahıda ola bilər. Bu aya 5 matçımız var. Bu müddətdə oyunçularımız problem yaşaya bilər. Rotasiyalarımız faydalı olmalıdır. Transfer xətrinə transfer istəmirik. Axtarışlarımız davam edir. Son günə qədər oyunçuları nəzərdən keçirəcəyik”.

Qeyd edək ki, “Qarabağ” ilin ilk rəsmi matçında “Tofiq Bəhramov”da “Şamaxı”nı 3:2 hesabla məğlub edib.