23 May 17:35
1 067
12 Punto 14 Punto 16 Punto 18 Punto

Erməni ekspert Varujan Qeqamyan Brüsseldə Azərbaycan Prezidenti İlham Əliyevlə Ermənistan Baş naziri Nikol Paşinyan arasında aparılan danışıqlar və əldə olunan razılaşmaları bir-bir təhlil edib və belə qənaətə gəlib ki, Brüssel razılaşmasında Azərbaycan tərəfi istəklərinin hər birinə nail olub.

Teleqraf.com erməni mediasına istinadən ekspert Qeqamyanın şərhini təqdim edir:

"Ermənistan, əslində Azərbaycandan kənarda Qarabağın statusu uğrunda mübarizədən imtina edir. Danışıqlar prosesində Qarabağın statusu ilə bağlı bir kəlmə də yoxdur. Yalnız “Qarabağ bölgəsindəki etnik erməni əhalisinin hüquqları və təhlükəsizliyi” qeyd olunur ki, bu da ən yaxşı halda ermənilərin Azərbaycanda milli azlıq kimi yaşaması deməkdir. Əslində bu, Qarabağın tamamilə silahsızlaşdırılması deməkdir.

Üstəlik, “Dağlıq Qarabağ” termini artıq işlədilmir. Brüssel bəyanatında sadəcə olaraq Azərbaycanın inzibati-ərazi bölgüsü ideyasına əsaslanan “Qarabağ regionu”ndan bəhs edilir və ayrıca statusu nəzərdə tutmur.

Azərbaycanla sülh müqaviləsi hazırlanır ki, onun əsas müddəası Azərbaycanın, o cümlədən Qarabağın ərazi bütövlüyünün tanınmasıdır. Bu səbəbdən Qarabağ ermənilərinin “hüquqlarının və təhlükəsizliyinin təmin edilməsi” yalnız yuxarıda göstərilən razılaşma kontekstində qeyd olunur, çünki Qarabağın sadəcə olaraq başqa statusu olmayacaq.

Bəyanatda deyilir ki, tərəflər “Azərbaycan ərazisindən Ermənistanın müxtəlif hissələri arasında tranzitin təmin edilməsi prinsipləri” barədə razılığa gəliblər. Bu qeyri-müəyyən ifadə əslində əsas yollarımızın keçdiyi Ermənistanın Tavuş və Ararat rayonlarındakı anklavları Azərbaycana verəcək: Ararat bölgəsində Vayots Dzor və Sünik rayonları ilə əlaqəni təmin edirlər və Tavuş bölgəsində - şimal və cənub arasında, İran və Gürcüstanı birləşdirən marşrut boyunca yerləşir.

Yəni, bu ərazilər Azərbaycana veriləcək, ondan sonra biz xüsusi icazə və nəzarət altında rayondan bölgəyə köçmək məcburiyyətində qalacağıq. Eyni aqibəti yaşayan Gorus-Kafan yolunu xatırlamaq yerinə düşər".


Müəllif: Nemət