600 min manat rüşvət alan sabiq hakimin şikayəti rədd edildi

Məhkəmədə dələduzluq və rüşvətxorluqda təqsirləndirilən keçmiş hakim Həsən Əliyevin kasasiya şikayəti üzrə məhkəmə prosesi keçirilib.

Teleqraf.com xəbər verir ki, sabiq hakimin də mühakimə olunduğu Gəncə Ağır Cinayətlər Məhkəməsinin hökmü ilə Elman Məmmədov 8 il, Taleh Süleymanov 7 il müddətinə azadlıqdan məhrum edilib. Həsən Əliyev isə 7 il cəzaya məhkum olunub. Zamində olan Həsən Əliyev məhkəmə zalında həbs edilib.

Hökmdən narazı qalan təqsirləndirilən şəxslər apelyasiya şikayəti veriblər. Həsən Əliyev günahsız olduğunu və barəsində bəraət hökmünün çıxarılmasını, digər təqsirləndirilən şəxslər isə cəzalarının azaldılmasını istəyiblər.

Gəncə Apelyasiya Məhkəməsi apelyasiya şikayətlərini təmin etməyib. Bu qərardan Həsən Əliyev kasasiya şikayəti verib.

Hakim İmran Hacıqayıbovun sədrliyi ilə keçirilən prosesdə Həsən Əliyevin kasasiya şikayəti üzrə qərar elan edilib. Qərara görə, kasasiya şikayəti təmin edilməyib.

İttiham aktına görə, Rusiyadan gələn iş adamı Ramazan Səlimov işə düzəlmək üçün 2011-ci ildən tanışı Elman Məmmədova üz tutub. Elman Məmmədov isə onu Bakı Ağır Cinayətlər Məhkəməsinin hakimi Həsən Əliyevlə tanış edib. Həsən Əliyev Ramazan Səlimovdan işə düzəltmək adı ilə 600 min manat pul alıb, lakin sonradan pulu qaytarmayıb.

Bundan sonra Ramazan Səlimov polisə şikayət edib. Şikayət əsasında cinayət işi başlanıb və Elman Məmmədov həbs olunub. Daha sonra məlum olub ki, Taleh Süleymanov adlı şəxs də cinayətdə iştirak edib, o da həbs edilib.

İstintaq dövründə Həsən Əliyevə qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq törətmə) maddəsi ilə bərabər, Cinayət Məcəlləsinin 312-ci (rüşvət vermə) maddəsi ilə də ittiham elan olunub.

Prezident İlham Əliyev Həsən Əliyevin səlahiyyətlərinə vaxtından əvvəl xitam verilməsi haqqında sərəncam imzalayıb. Buna səbəb kimi Həsən Əliyevin qanunvericiliyin tələblərini dəfələrlə kobudcasına pozması göstərilib.

Hacı Zeynalov