“Sahil” niyə uzun müddətə bağlanır? - Cavab

“Sahil” metrostansiyası 1 il yox, 10 aylığa bağlanır. Bu, uzun müddətli bağlanma deyil. Nəzərə alaq ki, metrostansiya əsaslı təmir olunacaq.

Bunu Teleqraf.com-a açıqlamasında Bakı Metropoliteni QSC-nin ictimaiyyətlə əlaqələr şöbəsinin rəisi Nəsimi Paşayev deyib.

Onun sözlərinə görə, “Bakı Metropoliteni” işləri maksimum tez yekunlaşdırmağı planlaşdırılır: “Məsələ tək bizim qurumun fəaliyyəti ilə bağlı deyil. Çalışacağıq təmiri işlərini maksimum tez yekunlaşdıraq. Metroda olan 3 eskalator çıxarılacaq, əvəzinə yeni 4 eskalatoru quraşdırılacaq”.

Qeyd edək ki, Bakı Metropoliteni QSC "Sahil" stansiyasının avqustun 20-dən sərnişinlərin giriş-çıxışı üçün bağlanacağı barədə məlumat yayıb. Bildirilir ki, qatarlar bu stansiyada dayanmadan "İçərişəhər" və əks istiqamətdə hərəkət edəcək.

Təmir işlərinin 2018-ci ilin iyun ayının sonlarına qədər yekunlaşdırılması nəzərdə tutulur.

QSC sərnişinlərdən getdikləri ünvanı əvvəlcədən nəzərə alaraq, metronun "Sahil" stansiyasına yaxın olan "İçərişəhər" və "28 May" stansiyalarının xidmətindən istifadə etməyi məsləhət görür.