Jurnalistikanın tələbələri mükafat aldı - FOTO

BDU-da “Mənim İmzam” layihəsinin qalibləri müəyyənləşdi

Bakı Dövlət Universiteti Jurnalistika fakültəsi tələbələri arasında keçirilən “Mənim İmzam” (sosial mövzuda) foto-müsabiqəsinin qalibləri mükafatlandırılıb. “Mənim İmzam” layihəsinin koordinatoru Rəşid Mustafazadənin Teleqraf.com-a verdiyi xəbərə görə, jurnalistika fakültəsi tələbə-müəllim heyətinin təşkilatçılığı və Bakı Dövlət Universiteti Tələbə Həmkarlar İttifaqı Komitəsinin dəstəyilə start götürən və artıq bir aya yaxın davam edən “Mənim İmzam” müsabiqəsinin ilk nominasiyası sosial mövzuda ən yaxşı foto olub.

Universitetdə keçirilən ilk təltifetmə mərasimində Jurnalistika fakültəsinin dekanı, prof. Şamil Vəliyev prof. Cahangir Məmmədli, prof. Nəsir Əhmədli, “Mənim İmzam” layihəsinin rəhbəri, dekan müavini Əli Hacıyev, BDU THİK sədri Daşqın Qənbərov çıxış edərək tələbələr arasında keçirilən müsabiqələrin əhəmiyyətindən danışıblar.

Əməkdar jurnalist Şamil Vəliyev “Mənim İmzam” layihəsinin ərsəyə gətirənlərə təşəkkürünü bildirərək, tələbələrə uğurlar arzu edib. Jurnalistika fakültəsi əməkdaşları və tələbələrinin yüksək maraq göstərdiyi tədbirdə müsabiqə boyu göndərilmiş fotolardan hazırlanmış çarx nümayiş olunub. “Mənim İmzam” layihəsi haqqında geniş məlumat verən Əli Hacıyev tələbələri növbəti nominasiyalarda da aktiv iştirak etməyə dəvət edib. Cahangir Məmmədli gələcəyin jurnalistlərinə uğurlar arzulayıb və növbəti nominasiyanın mükafat fondunun formalaşdırılmasında kömək edəcəyini qeyd edib.

Daşqın Qənbərov universitet rəhbərliyinin tələbələr üçün yaratdığı şəraitdən söz açaraq, gələcəkdə də onların bütün təşəbbüslərini dəstəkləməyə hazır olduğunu bildirib.

Əməkdar jurnalist Nəsir Əhmədli öz növbəsində Bakı Dövlət Universiteti Jurnalistika fakültəsi tələbələrinin son zamanlar dövri mətbuatda aktiv çıxış etməsini təqdirəlayiq hesab edib.
Daha sonra I,II və III yerlərin qalibləri diplom və hədiyyələrlə mükafatlandırılıb.

Beləliklə, “Mənim İmzam” adlı foto-müsabiqədə I yerə 3-cü kurs tələbəsi Orxan Səfərli, II yerə 2-ci kurs tələbəsi Qoşqar Bəylərov, III yerə isə 1-ci kurs tələbəsi Loğman Kamranlı layiq görülüb.

Xatırladaq ki, BDU Jurnalistika fakültəsində hər ay müxtəlif nominasiyalar üzrə fakültə daxilində müsabiqə elan olunur və müsabiqə müddəti ərzində həm müəllim, həm tələbə heyəti və eyni zamanda nominasiyadan asılı olaraq peşəkarlar arasında səsvermə keçirilərək qalib müəyyən olunur.

NİGAR