Ramil Qasımov: “Avropa Oyunları hər bir azərbaycanlını qürurlandırır”

Azərbaycanın tanınmış vokalçısı Ramil Qasımov yeni “Zəfər nəğməsi-İdman Azərbaycan” mahnısına çəkdirdiyi klipi təqdim edib. Mahnının musiqisi gənc bəstəkar Nigar Qarayevaya, sözləri Əməkdar incəsənət xadimi Abdulla Qurbaniyə məxsusdur.

Mahnı Tofiq Əhmədov adına estrada-simfonik orkestri və Cahangir Cahangirov adına xorun müşayiəti ilə ifa olunub. Klipin quruluşçu rejissoru - Elnur Əliyev, quruluşçu operatoru isə Elvin Rəhimlidir.

Azərbaycan Televiziya və Radiosu Qapalı Səhmdar Cəmiyyətinin musiqi kollektivlərinin bədii rəhbəri və Səsyazma Evinin direktoru Ramil Qasımov Teleqraf.com-a açıqlamasında qeyd edib ki, müasir, çiçəklənən, qüdrətli Azərbaycanımız durmadan inkişaf edir:

“İlk Avropa Oyunlarının Azərbaycanda keçirilməsi hər bir azərbaycanlıya böyük qürur və iftixar hissi verir. İndi, vaxtı ilə Ümummillli Lider Heydər Əliyevin ”Mən fəxr edirəm ki, Azərbaycanlıyam!" ifadəsi hər bir azərbaycanlının həyat kredosuna çevrilib. Doğma Azərbaycanımızda İlk Avropa Oyunları münasibətilə hər birimiz dövlətinə, xalqına faydalı olmağı və bu tədbirin yüksək səviyyədə keçirilməsi üçün daim öz töhfələrini verməyə çalışır. O cümlədən də mən. Azərbaycanımızın adı bu gün dünyanı fəth edir. Bir gənc musiqiçi kimi bu uğuru musiqi dili ilə çatdırmaq biz mədəniyyət işçilərinin bilavasitə mənəvi borcudur. İlk Avropa Oyunlarına həsr olunan birinci mahnı “İlk Avropa oyunları” mahnısıdır. Musiqisi Nigar Qarayevaya, sözləri Abdulla Qurbaniyə məxsus bu mahnını AzTV-nin solistlərdən Kamilə Nəbiyeva, Günay İmamverdiyeva, Ayşən Mehdiyeva, Mirələm Mirələmov, Sərxan Bünyadzadə, Orxan Hüseynli ifa ediblər. İkinci mahnı - musiqisi Eldar Mansurova, sözləri Vahid Əzizə məxsus “Avropa oyunları” mahnısını Xalq artisti Heydər Anatollu, Əməkdar artist Lalə Məmmədova, Cahangir Cahangirov adına xorun solistləri: Bəxtiyar Bağırov və Nicat Cəfərzadə, Aynur İsgəndərli və Vaqif Mustafazadə adına “Sevil” vokal instrumental ansamblı ifa edir. Üçüncü mahnı “Qələbə bizimlədir” mahnısıdır. Bu mahnının musiqisi bəstəkar Azad Zahidə məxsusdur. Bu mahnını solistlərdən əməkdar artistlər Fərid Əliyev - Cahangir Qurbanov, Çinara Şirin, Aygün Zeynolova ifa edirlər. Klipdə müasir Azərbaycanımızın görüntüləri görünür. Mahnının xor hissəsində “Şan şöhrətim Azərbaycan, güc-qüdrətim Azərbaycan”- sözlərini sanki bütün xalq ifa edir. Bu klipin ərsəyə gəlməsi üçün ilk öncə olaraq televiziya rəhbərliyinə və bütün əməkdaşlara minnətdarlığımı bildirirəm. Ümid edirəm ki, bu mahnı idmançılara dəstək və ilk Avropa Oyunlarında qalib olan idmançılara bir töhfə olacaq".

Nərmin