“Qarabağ”ın qolunun müəllifi Dino “Teleqraf”da – Müsahibə

Teleqraf.com dünən “Kopenhagen”lə cavab görüşü zamanı “Qarabağ”ın vurduğu yeganə qolun müəllifi, “Qarabağ” futbol klubunun hücumçusu Dino Ndlov ilə eksklüziv müsahibəni təqdim edir.

- Dino, sizin vurduğunuz qol “Qarabağ”ın tarixə düşməsinə böyük kömək oldu. Dünənki qələbədən sonra hansı hisləri yaşayırsınız?

- Əvvəla, deyim ki, bu oyunda iştirak etmək çox əla hiss idi və hamımıza, o cümlədən də mənə xoş emosiyalar bəxş elədi. Bu, böyük bir şans idi. Hər bir futbolçuya nəsib olmur ki, bu qədər mötəbər yarışda iştirak eləsin. Dünənki qol da təkcə mənim əməyim deyildi, bu, bütün komandanın əməyi idi. Bunu bütün komandanın uğuru kimi qiymətləndirmək lazımdır.

- Qolu məhz özünüzün vuracağınıza inanırdınız?

- Əlbəttə ki, inanırdım. Bu mənim işimdir. Qol vurmağıma inanmasam, bu baş verə də bilməz. Ən birincisi və elə ən vacibi inamın olmasıdır.

- Qarabağa transfer olanda nə vaxtsa Çempionlar Liqasının qrupunda oynayacağınıza inanırdınızmı?

- Bu, hər bir futbolçunun xəyalıdır ki, ÇL-in qrupunda oynasın. Amma mənim təkcə xəyalım deyildi. Bizim komandanın hədəfi Çempionlar Liqasının qrupuna düşmək idi. Ona görə də bu qrupa düşmək mənim üçün təəccüblü olmadı. Çünki komandaya gəlməkdə məqsədim elə komandanın qrupa düşməsinə yardımçı olmaq idi. Biz birgə çalışdıq və bunu bacardıq.

- Oyun bitəndən sonra hamı qələbəni çılğınlıqla qeyd etsə də, siz sakit görünür, rəqib oyunçulara təsəlli verirdiniz. Hətta yerdə uzanmış bir rəqibin əlindən tutub qalxmasına köməkçi oldunuz. Bunu necə şərh edərdiniz?

- Bu, sadəcə olaraq, hansı komandada olmasından asılı olmayaraq, bizim hər bir futbolçuya qarşı göstərdiyimiz hörmətdən irəli gəlir. Bizim baş məşqçimiz Qurban Qurbanov həmişə rəqib komandadan olsa belə, həmkarlarımıza hörmətlə yanaşmağı tələb edir. Mən sadəcə hörmət etdim.

- Hansısa klub varmı ki, o kluba qarşı oynamaq arzunuz olub və qrupda həmin komanda ilə qarşılaşmaq istəyirsiniz?

- Açığı, mənim üçün elə güclü fərqi yoxdur. Bu qrupa düşən bütün rəqiblər güclü komandalardır. Ona görə də kiminlə üzləşsək, bir şey dəyişmir.

- Dino, uğurlar!

- Sizə də!

Dino Ndlov ilə eksklüziv müsahibədə göstərdiyi köməyə görə “Qarabağ” futbol klubunun mətbuat katibi Nurlan İbrahimova təşəkkürlər!