"Vengeri özümə rəqib görmürəm" – Mourinyo

"Çelsi"nin baş məşqçisi Joze Mourinyo İngiltərə Premyer Liqasının 34-cü turunda qarşılaşacaqları "Arsenal"la oyunöncəsi maraqlı fikirlər səsləndirib.

Qol.Az-ın məlumatına görə, BBC-yə danışan portuqaliyalı mütəxəssis "Arsenal"ın baş məşqçisi Arsen Vengeri özünə rəqib görmədiyini bildirib:

"Bu oyun Sesk Fabreqasın "Çelsi"nin heyətində "Arsenal"a qarşı ilk oyunu olacaq. Əgər "topçular"ın azarkeşləri sabiq futbolçularını fitə basarsa, o, bunun öhdəsindən gələcək. Fabreqas "Çelsi"nin futbolçusudur. Onun "Arsenal"a qayıtmamasının səbəbini bilmirəm.

Vengerlə münasibətlərimə gəlincə, o, mənim yaşadığım və işlədiyim şəhərin klubunun baş məşqçisidir. "Arsenal" da "Çelsi" kimi qarşısında böyük hədəfləri olan komandadır. Vengerlə aramızda müəyyən rəqabət var, ancaq onu özümə ciddi rəqib görmürəm".

Qeyd edək ki, aprelin 26-da keçiriləcək "Arsenal" və "Çelsi" derbisi Bakı vaxtı ilə saat 20:00-da başlayacaq.