İlhamə Quliyevanın bacısı məhkəmədə ifadə verdi

Bu gün Bakı Ağır Cinayətlər Məhkəməsində mərhum xalq artisti İlhamə Quliyevanın köməkçisi Mehriban Hüseynovanın cinayət işi üzrə məhkəmə prosesi davam etdirilib.

Hakim Səbuhi Hüseynovun sədrliyi ilə keçirilən prosesdə zərərçəkmiş şəxsin hüquqi varisi, İ. Quliyevanın bacısı İradə Həsənova ifadə verib.

O səhhəti ilə əlaqədar danışmağa çətinlik çəkdiyini deyib, ancaq bildirib ki, ibtidai istintaqa verdiyi bütün ifadələrini təsdiq edir.

İradə Həsənova M. Hüseynovanın qanun çərçivəsində cəzalandırılmasını istəyib.

Proses sentyabrın 27-də davam etdiriləcək.

Qeyd edək ki, M. Hüseynova Cinayət Məcəlləsinin 29.180.3.2-ci (külli miqdarda soyğunçuluq etməyə cəhd) maddəsinə əsasən ittiham olunur. O, İ. Quliyevanın şikayəti əsasında saxlanılıb.

İ. Quliyeva bu il fevralın 25-də dünyasını dəyişib.

APA