Müsavat seçkilərlə bağlı qərar verəcək: "Mənim şəxsi fikrim..." – Başqan müavini

Artıq növbədənkənar parlament seçkilərinə start verilib. Bir çox siyasi partiyalar seçki hazırlıqlarına başlayıb. Növbədənkənar parlament seçkilərində bu dəfə hansı siyasi partiyaların iştirakı diqqət mərkəzindədir.

Mövzu ilə bağlı Teleqraf.com-a danışan Müsavat başqanının müavini Gülağa Aslanlı seçkilərə qatılıb-qatılmaqla bağlı hələlik yekun qərarın olmadığını söyləyib.

O hazırda Müsavat Partiyasının növbədənkənar parlament seçkilərində iştirak edib-etməməsi ilə bağlı müzakirələr getdiyini bildirib: “Bu gün Müsavat Partiyasının Divanının toplantısında da bu məsələ müzakirə edildi. İyulun 4-də Müsavat Məclisinin çağırılması haqqında qərar verilib. Həmin tarixdə keçiriləcək Məclisin yığıncağında Müsavat Partiyasının seçkilərdə iştirak edib-etməməsi haqda yekun qərar veriləcək”.

Gülağa Aslanlı həmçinin partiyanın sonrakı addımlarının da iyulun 4-də veriləcək qərara uyğun olaraq həyata keçiriləcəyini açıqlayıb: “Partiya funksioneri kimi Müsavat hansı qərarı verəcəksə, hamımız ona tabe olacağıq. Burada mənim istəyim ancaq şəxsi ola bilər. Partiya funksionerləri ümumi qərarlara uyğun hərəkət edəcək”.