AzTV-nin tanınmış əməkdaşı vəfat etdi

Tanınmış parodiyaçı Həsən Cəbrayılov vəfat edib.

APA-nın xəbərinə görə, 1949-cu il təvəllüdlü Həsən Cəbrayılov bu gün səhər saatlarına müalicə aldığı xəstəxanada dünyasını dəyişib.

70 illik yubileyini bu yaxınlarda qeyd edən sənətçi bir neçə gün əvvəl ürək çatışmazlığı səbəbilə xəstəxanaya aparılıb və əməliyyat olunub.

O, Bakıdakı Pirşağı qəbiristanlığında dəfn olunacaq.

Mərhumun dostu, musiqiçi Abbasqulu Nəcəfzadənin sözlərinə görə, Həsən Cəbrayılov 4 gün əvvəl işdən evə gedən zaman yolda infarkt keçirib və təcili xəstəxanaya çatdırılaraq əməliyyat olunub.

Əməliyyatı edən həkim bildirib ki, Həsən Cəbrayılov özü də bilmədən daha əvvəl 4 dəfə mini infarkt keçirib. Mərhumun yas mərasimi yaşadığı Yasamal rayonunda keçiriləcək.

Qeyd edək ki, mərhum "Azərbaycan Televiziya və Radio Verilişləri" QSC-də (AZTV) çalışırdı.