ADİU-nun yeni tədris ilində ilk Elmi Şurası keçirilib

Azərbaycan Dövlət İqtisad Universiteti Elmi Şurasının 2014/2015-cü tədris ili üçün ilk iclası keçirilib.

İclasda universitetin rektoru ölkədə ilk dəfə yaradılan SABAH qruplarında 7 baza ali təhsil müəssisələri arasında ADİU-nun I yerdə dayandığını bildirib. SABAH qruplarına müraciət edən tələbələrin üçdə birinin İqtisad Universitetini seçdiyini deyən rektor, əlavə edib ki, bu ali təhsilin sabahıdır. Buna görə də ADİU SABAH gənclərinin təhsil alacağı auditoriyalara fərqli yanaşıb. Rektor bildirib ki, universitetimizi necə görmək istəyiriksə, o modeli ilk olaraq “SABAH”da yaratmışıq. SABAH üçün yaradılan şərait bütün universitetə şamil olunacaq.

Elmi Şurada ADİU-da kadr potensialını artırmaq məqsədilə görülən işlərdən də danışılıb. Bildirib ki, universitetin “İşçilərin işə qəbulu və yerdəyişməsi” komissiyasına 309 nəfər müraciət edib. Onlardan 75 nəfərinin vəzifəsi artırılıb, 20 nəfərə yaxın xaricdə təhsil almış ərizəçi işə götürülüb. Bu sahədə işin davam etdiriləcəyi qeyd olunub.

İclasda oktyabrın 1-dən etibarən ADİU əməkdaşlarının əmək haqqlarının 15% artırıldığı bildirilib. Universitetin maliyyə bazası artdıqca əmək haqqlarının daha da yüksələcəyi vurğulanıb. 10 nəfər 75-80 yaşlı dosentin könüllülük prinsipi əsasında təqaüdə çıxacağı təqdirdə, bir illik əmək haqqlarının həmin gün onlara təqdim olunacağı bildirilib.

Şura üzvləri Xüsusi İstedadlar fakültəsinin 74 tələbəsinin 275 min manat həcmində yığılmış təhsil haqqı borcunu da müzakirə ediblər. Qərara alınıb ki, bu borc ADİU-nun vəsaiti hesabına ödənilsin.
Tədbirdə Ümumi İtqtisadiyyat fakültəsinin adı dəyişdirilərək, İqtisadiyyat və Sənaye fakültəsi adlandırılmasını təklif olunub. Təklif səsə qoyularaq qəbul edilib.

İclasda iyun ayından tələbələrin və universitet əməkdaşlarının müzakirəsinə verilən “İşçilərin universitetdaxili intizam qaydaları” ilə “Tələbələrin universitetdaxili intizam qaydaları” qəbul edilib. Bu qaydalar sentyabrın 22-dən qüvvəyə minib.

Elmi Şurada həmçinin ilin sonuna qədər universitetin ştat cədvəlinin hazırlanması, vətəndaşlarla işin daha da təkmilləşdirilməsi müzakirə olunub. Qərara alınıb ki, prorektorların qəbul günləri müəyyən olunaraq universitetin saytında yerləşdirilsin.

Şurada MBA-nın Magistratura Mərkəzindən ayrılaraq departament kimi fəaliyyət göstərməsi səsə qoyaraq qəbul edilib.