Hikmət Hacızadə vəfat etdi

Azərbaycanın Rusiyadakı keçmiş səfiri, politoloq Hikmət Hacızadə vəfat edib.

Teleqraf.com xəbər verir ki, bu barədə onun oğlu Adnan Hacızadə məlumat verib.

Mərhum bu gün saat 11:30-da Yasamal qəbiristanlığında dəfn ediləcək.

Hikmət Hacızadə 1954-cü ildə Bakıda anadan olmuşdu. 1977-ci ildə ADU-nun fizika fakültəsini bitirmiş, 1983-cü ildə Moskvada fizika-riyaziyyat elmləri namizədi adını almaq üçün dissertasiya müdafiə etmişdi.

Azərbaycan EA-nın Fizika İnstitutunda böyük elmi işçi vəzifəsində işləmişdi. Xalq hərəkatında fəal iştirak etmiş, Azərbaycan Xalq Cəbhəsinin yaradıcılarından biri, birinci İdarə Heyətinin üzvü, AXC-nin "Svoboda" qəzetinin redaktoru olmuşdu.

Xalq Cəbhəsinin hakimiyyəti dövründə baş nazirin müavini və Azərbaycanın Rusiyada səlahiyyətli nümayəndəsi işləmişdi.

Demokratiya problemlərinə həsr olunmuş "Demokratiya haqqında 150 000 işarə" (1995),"İnsan Haqları - bəşəriyyətin əsas ideyası" (1997), "Demokratiya: Gediləsi uzun bir yol" (Demokratiya Antalogiyası) və başqa kitabların müəllifidir.

Allah rəhmət eləsin!