Şəhid jurnalistə həsr olunan sənədli film çəkildi - "Son çəkiliş"/Nadir görüntülər

İyunun 4-də Kəlbəcər rayonunun Susuzluq kəndi yaxınlığında baş verən mina partlayışı nəticəsində şəhid olan operator Sirac Abışovla bağlı işlədiyi televiziya – Azərbaycan Televiziyası tərəfindən sənədli film çəkilib.

Teleqraf.com xəbər verir ki, “Son çəkiliş” adlı 40 dəqiqəlik sənədli filmdə Sirac Abışovun uşaqlıq, ilk gənclik və gənclik illəri barədə söhbət açılır. Şəhidin anası Azadə Səmədova, atası Abış Səmədov, həyat yoldaşı Sehran Abışova, qardaşı Şirzad Səmədov, tarix müəllimi Zeynəb Seyidova, iş yoldaşı İlyas Bəhmənoğlu, Emin Məmmədovun fikirləri yer alır.

Sənədli filmdə Sirac Abışovun bir sıra eksklüziv foto və video görüntüləri yer alıb.

Qeyd edək ki, Azərbaycan Televiziyasının operatoru Sirac Abışov 1989-cu il avqustun 29-da Qubadlı rayonunun Dondarlı kəndində anadan olub. Dörd yaşında isə məcburi köçkün kimi Sumqayıtda məskunlaşıb. 1993-ü ildən ailəsi ilə birlikdə Hacı Zeynalabdin Tağıyev qəsəbəsindəki hərbi şəhərcikdə yaşayırdı. O, 2019-cu ildən AzTV-də işləməyə başlayıb. Bir övladı olan Sirac Abışov iyunun 4-də Kəlbəcər rayonunun Susuzluq kəndi ərazisində xidməti vəzifəsini icra edərkən tank əleyhinə mina partlaması nəticəsində şəhid olub. Sirac Abışov iyunun 5-də Sumqayıt şəhər Şəhidlər Xiyabanında dəfn edilib.

Partlayış nəticəsində, həmçinin, Azərbaycan Dövlət İnformasiya Agentliyinin müxbiri Məhərrəm İbrahimov və Kəlbəcər Rayon İcra Hakimiyyəti başçısının Susuzluq kənd inzibati ərazi dairəsi üzrə nümayəndəsinin müavini Arif Əliyev də şəhədət zirvəsinə yüksəlib. Bu, 44 günlük Vətən müharibəsi dövründə döyüşlərin getdiyi ərazidə jurnalistlərin şəhid olması ilə bağlı ilk hal olub.

Prezident İlham Əliyevin iyunun 14-də imzaladığı sərəncamla Azərbaycan Respublikasının işğaldan azad olunan ərazilərində vəzifə borcunu ləyaqətlə yerinə yetirərkən həlak olmuş Sirac Abışov, Məhərrəm İbrahimov və Arif Əliyev 3-cü dərəcəli “Vətənə xidmətə görə” ordeni ilə təltif edilib.

Film Sirac Abışovun, Məhərrəm İbrahimovun və Arif Əliyevin şəhidlik zirvəsinə ucalmasının 40-cı gününün tamam olduğu 15 iyul tariixndə, saat 21:30-da efirə gedib.