“Gəlin, dönək evə” mahnı müsabiqəsinin qalibləri açıqlandı - Foto

Avqustun 29-u Milli Qəhrəman Çingiz Mustafayevin doğum günü münasibətilə "Çingiz Mustafayev adına Fond" və "ANS Şirkətlər Qrupu"nun hərbi-vətənpərvərlik mövzusunda "Gəlin, dönək evə" adlı mahnı müsabiqəsinə yekun vurulub.

Teleqraf.com xəbər verir ki, Azərbaycan Milli Konservatoriyasında keçirilən Azərbaycanın görkəmli incəsənət xadimləri iştirak edirdi.

“Ən yaxşı vətənpərvər mahnı” kateqoriyasında Elmar Kərimov, ”Ən yaxşı əsgər və şücaət mahnısı” kateqoriyasında Gülnar Verdiyeva mükafat qazanıb. Münsiflər heyətinin xüsusi mükafatını da Gülnar Verdiyeva (“Şəhidlər balladası”na görə), “Həvəsləndirici mükafat”ı həvəskar bəstəkar İqbal Ağayev qazanıb.

Qeyd edək ki, Çingiz Mustafayev adına Fond qaliblərə 1 000 AZN pul mükafatı, diplom və VMF milli saat fabrikinin xüsusi olaraq bu müsabiqə üçün istehsal etdiyi saat hədiyyə edib. Xatırladaq ki, müsabiqənin münsiflər heyətinə Azərbaycanın Xalq artisti Cavanşir Quliyev, Xalq şairi Sabir Rüstəmxanlı, Bəstəkarlar İttifaqının üzvü Cahangir Zülfüqarov, ANS Şirkətlər Qrupunun prezidenti Vahid Mustafayev, ANS Şirkətlər Qrupunun vitse-prezidenti Seyfulla Mustafayev və “Ozan” qrupunun üzvü Rasim Müzəffərli daxil idi. Müsabiqədə 21 mahnı ikinci tura keçsə də, cəmi 4 mahnı qalib seçilib.