“İnstitutda 100 minlərlə vəsaitin mənimsənilməsi...” – Alimlərin işi

Qarabağ bölgəsində tədqiqat aparılması üçün ayrılmış külli miqdarda vəsaiti mənimsəməkdə təqsirləndirilən Azərbaycan Milli Elmlər Akademiyası Arxeologiya, Etnoqrafiya və Antropologiya İnstitutunun sabiq əməkdaşları, tarixçi alim Səbuhi Hüseynov və həyat yoldaşı Gülüstan İsayevanın cinayət işi üzrə məhkəmə prosesi keçirilib.

Teleqraf.com xəbər verir ki, Bakı Ağır Cinayətlər Məhkəməsində hakim Azad Məcidovun sədrliyi ilə baş tutan prosesdə institutun direktoru Abbas Seyidovun məhkəməyə ərizə göndərdiyi məlum olub.

Hakim ərizəni elan edib. Bəlli olub ki, Abbas Seyidov cinayət işi üzrə şahid qismində tanınan institutun hüquq şöbəsinin müdiri Fəxrəddin Gözəlovun şahid qismində tanınmasına xitam verilməsini, onun zərərçəkmiş şəxsin nümayəndəsi qismində tanınmasını istəyib.

Hakim bildirib ki, Baş Prokuror yanında Korrupsiyaya qarşı Mübarizə İdarəsi tərəfindən zərərçəkmiş şəxsin nümayəndəsi Şahin Əsgərov tanınıb. Hakim əlavə edib ki, ərizədə Şahin Əsgərovun nümayəndəliyinə xitam verilməsi üçün heç bir qeyd yoxdur.

Prokuror məsələni məhkəmənin mülahizəsinə verdiyini deyib.

Təqsirləndirilən şəxslərin vəkilləri isə nümayəndənin dəyişdirilməsinə etiraz ediblər. Vəkil Abusəməd Səmədov bildirib ki, Fəxrəddin Gözəlov istintaq orqanı tərəfindən şahid qismində tanınıb, hazırda onun adı şahidlər siyahısına salınıb və dindirilməsi üçün məhkəməyə təqdim olunub. Onun sözlərinə görə, Fəxrəddin Gözəlovun şahid qismində tanınmasına xitam verilməsi üçün əsas yoxdur, qanun buna yol vermir.

Təqsirləndirilən şəxslər də Fəxrəddin Gözəlovun şahid qismində tanınmasına xitam verilməsinə etiraz ediblər. Bildiriblər ki, həmin şəxs istintaqda dindirilmiş əsas şahidlərdən biridir.

Abusəməd Səmədov deyib ki, məhkəmədə şahidin statusuna xitam verilməsi, nümayəndə kimi tanınması halı heç vaxt təcrübədə olmayıb. Vəkil belə bir halin baş verəcəyini biabırçılıq kimi qiymətləndirib.

Hakimlər məsələ ilə bağlı qərar qəbul etməyiblər. Hakim Azad Məcidov bildirib ki, məhkəmə şahid Fəxrəddin Gözəlovu dinləyəndən sonra bu məsələ ilə bağlı qərar qəbul edəcək: “Biz hazırda həmin şahidin nə ifadə verəcəyini bilmirik. Ona məhkəmədə şahid qismində dindirək. Ondan sonra nümayəndə kimi tanınması məsələsinə baxılacaq”.

Daha sonra Gülüstan İsayeva vəkilinin suallarını cvablandırıb. O bildirib ki, vəzifə səlahiyyətlərindən, qulluq mövqeyindən sui-istifadə etməyib. Kadrlar şöbəsində işləsə də, bir çox məsələlərlə əlaqəsi olmayıb. İşçilərin işə götürülməsindən, ekspedisiya gedən şəxslərdən xəbərsiz qalıb.

Gülüstan İsayevanın sözlərinə görə, ekspedisiya üzvlərinin təyin olunması onun səlahiyyətlərinə aid olmayıb. Ekspedisiya üzvlərini institutunun direktoru müəyyən edib.

Gülüstan İsayeva bildirib ki, ezamiyyət, məzuniyyət və digər məsəllərlə bağlı maliyyə məsələləri onun səlahiyyətlərinə daxil edilməyib. Bu məsələlərlə baş mühasib Zülhiyyə Cəfərova, mühasib Salman Muradov məşğul olub.

Hakimin iş materiallarındakı institutunun direktoru Abbas Seyidovun Baş Prokurorluğa ünvanlandığı məktubu elan edib. Həmin məktubda institut direktoru Gülüstan İsayevanı rüşvət almaqda ittiham edib. Həmin məktubda ayrı-ayrı şəxslərin izahatları da elan edilib.

Gülüstan İsayeva isə bunun şər-böhtan olduğunu deyib. Hakim təqsirləndirilən şəxsdən soruşub ki, izahatınızda Abbas Seyidovun ekspedisiya üzvlərinin adlarını siyahıya salmaqla milyonlarla pul mənimsəməsi barədə ilk dəfə Baş Prokurorluğa nə vaxt şikayət edibsiz?

Gülüstan İsayeva deyib ki, ilk dəfə 2022-ci ildə, işdən çıxandan sonra prokurorluğa şikayət edib: “Abbas Seyidov dövlətin pulunun qədrini bilən şəxs olubsa, o zaman institutda yoxlama aparardı, 100 minlərlə vəsaitin mənimsənilməsinə yol verməzdi. İndi məndən nə istəyirlər? Biz həmişə dövlətə bağlı, sədaqəti insanlar olmuşuq. Mən bir uşaq anasıyam. Heç bir günahım yoxdur. Atam da polis polkovniki olub, dövlətə xidmət edib. Hazırda zaldadır, prosesi izləyir. Biz günahsızıq. Günahı olanlar isə kənarda qalıb”.

Daha sonra Səbuhi Hüseynovun vəkili vəsatətlə çıxış edib. O, institutdan tabel dəftərlərinin alınmasını, məhkəmədə tədqiq olunmasını istəyib.

Prokuror vəsatətə münasibət bildirmək üçün vaxt istəyib.

Növbəti proses aprelin 12-də davam edəcək.

İttihama görə, Səbuhi Hüseynov və həyat yoldaşı Gülüstan İsayeva Qarabağ bölgəsində tədqiqat aparılması üçün ayrılmış vəsaitin 92 min 700 manatını mənimsəməkdə təqsirləndirilir.

Səbuhi Hüseynov və Gülüstan Əliyeva barəsində Cinayət Məcəlləsinin 179.3.2-ci (külli miqdarda mənimsəmə), 308.2-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham elan edilib.

Cinayət Məcəlləsinin 179.3.2- ci maddəsi ilə 5 ilə, 308.2-ci maddəsi ilə 7 ilə, 313-cü maddəsi ilə isə 2 ilə qədər cəza nəzərdə tutulub.

Cinayət işi üzrə zərərçəkmiş qismində Azərbaycan Milli Elmlər Akademiyasının Arxelogiya, Etnoqrasiya və Antropoligiya İnstitutu tanınıb.