Bu qədər zülmün içində, məni bir ümid yaşadır... - İbrahim İlyaslı

Tanınmış şair İbrahim İlyaslı öz feysbuk səhifəsində son şeirini paylaşıb.

Teleqraf.com izləyicilər tərəfindən maraqla qarşılanan şeiri təqdim edir:

Halım hal deyil, soruşma

Sən gedəli necə varam.
Əlim ovcundan qopalı
Eləcənə tarimaram.

Qəm qoxuyur üstüm-başım,
Çölə həsrət divanəyəm.
Gölü quruyan balığam,
Bayquş ötən viranəyəm.

Günüm “sən” deyib başlanır,
Axşamım “sən” deyib bitir.
Alışıram dilim-dilim,
Əriyirəm sətir-sətir.

Nur çeşməsi – səsin ki, var
Hər yandan bürüyür məni.
Ürəyimdən bir ah qopur:
“Qız, səni sevirəm, səni!”

Bu qədər zülmün içində
Məni bir ümid yaşadır.
Başını qaldır, göyə bax,
İki ulduz baş-başadır.